OÉ-CUSSE, 01 marsu 2024 (TATOLI) – Governu liuhosi Ministériu Komérsiu no Indústria (MCI, sigla portugés), sesta ne’e hala’o identifikasaun bá Lagoa Maesmone ne’ebé lokaliza iha aldeia Maquelab, suku Taiboko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) poténsia ba futuru atu harii indústria masin.
Notísia relevante: Produtór masin lokál husu envolve iha Cesta Bázika
Ministru Komérsiu no Indústria Nino Pereira, hateten, RAEOA iha poténsia ekonómika lubuk iha rai Oé-Cusse, liuliu Pante Makasar kona-bá masin tradisionál (orgániku) maibé seidauk esplora ho didi’ak.
Tan ne’e, polítika IX Governu Konstitusionál liuhosi Ministériu Komérsiu no Indústria, atu dezenvolve, no presiza koordena ho Autoridade RAEOA liuhosi Diresaun Terra no Propriedade, atu identifika no sukat estatutu rai refere iha suku Taiboko nian.
“Ita iha planu boot ida, ba dezenvolvimentu indústria masin, ita haree rai Oé-Cusse iha poténsiá ba produsaun masin, tán ne’e presiza halo survey (levantamentu) ida, mai fatin ida-ne’e hodi haree terrenu, no halo koordenasaun ho parte relevante sira, liuliu terra propriedade, atu halo identifikasaun estatutu rai ne’e,” Ministru Nino Pereira ko’alia iha Oé-Cusse.
Ministru Nino Pereira sei halo koordenasaum hafoin pasa informasaun, kona-bá planu ministériu ninian, faze tuir mai enkontru tékniku ida ho parte relevante sira iha Oé-Cusse, nune’e bele realiza planu ba dezenvolvimentu indústria masin iha RAEOA.
“Tanba ita nasaun ida-ne’ebé, uluk ita prodús ona masin iha fatin barak, iha potensialidade boot, inklui mós iha RAEOA, ne’ebé servisu ne’e hanesan, faze inísiu ida-ne’ebé maka ita halo, ita iha pensamentu ne’ebé maka hanesan ho parte kompetente sira iha Oé-Cusse, nune’e ita bele iha objetivu ida, atubele dezenvolve produtu masin nian, iha Oé-Cusse,” nia katak.
Durante identifikasaun, Diretór Terra Propriedade RAEOA, Celestino Casenube, esplika ba ekipa tékniku sira hosi MKI, katak, estatutu lagoa Maesmone, nu’udar patrimóniu kulturál komunidade sira iha suku Taiboko.
Hanesan bee-lulik no fatuk-lulik, tán ne’e, bainhira tu halo dezenvolvimentu ruma, presiza koordena ho Autoridade lokál no komunidade sira, maibé kona-bá estatutu rai, Estadu nian.
Notísia relevante: Promesa MKIA, Harii Empreza no Dezenvolve Indústria
Entretantu, durante identifikasaun hosi Ministériu Komérsiu Indústria, akompaña hosi Vise-Koordenadór Zona Espesiál Ekonómia Dezenvolvimentu Oé-Cusse Ambeno (ZEEDOA), Herculano de Sousa.
Jornalista: Abílio Elo Nini
Editór: Evaristo Soares Martins
