MALIANA, 31 marsu (TATOLI)-Xefe suku Batugade, postu administrativu Balibo, munisípiu Bobonaro, Januário Moises, husu Ministériu Obra Públika (MOP) atu rezolve lalais estrada nasionál diresaun hosi liña fronteira Batugade ba to’o kapitál Maliana tanba daudaun ne’e kondisaun grave hafoin akontese udan-boot durante ne’e.
Notísia relevante: MOP sei halo manutensaun estrada Batugade-Balibo to’o Maliana
“Ami hotu-hotu ba ho motorizada, karreta públiku no privada atu asesu mai iha Maliana ne’e sente estrada ne’e grave la halimar. Ne’e duni ami husu governu, se bele tau matan ba estrada ne’e, tanba ita iha liña fronteira hanesan odamatan boot ba nasaun,” Xefe suku ne’e informa ba jornalista sira, iha edifísiu administrasaun munisipál Bobonaro, sesta ne’e.
Nia hatutan, durante ne’e kondisaun estrada refere difikulta tebes movimentasaun transporte públiku no privada.
Nune’e mós fó impaktu mós ba atividade ekonómiku tamba estrada barak maka ku’ak no kotu susar tebes ba komunidade sira atu transporta produtu lokál ba merkadu Maliana vila.
Nia haktuir, estrada refere governu antérior finaliza no hosi Batugade mai Balibo vila to’o agora sei uza hela obra ne’ebé governu Indonézia husik hela hafoin Timor-Leste ukun-aan.
Enkuantu estrada sira-ne’ebé governu rezolve ona ne’e mós balu ladún iha kualidade di’ak, tanba udan mai rai-halai sobu estraga fila-fali.
“Agora estrada sira-ne’e ladi’ak hotu ona, ne’e duni kondisaun estrada sira-ne’e presiza hadi’a maibé labele reabilita provizóriu de’it, tenke ser permanente, atu ita-nia movimentu ne’e bele normál fali,” nia katak.
Xefe suku Leo-Hitu, postu administrativu Balibo, munisípiu Bobonaro, Benjamin Maia, hateten, durante viajen ba-mai estrada parte Manuten dodok iha suku Leolima grave tebes no balun ameasadu atu kotu hotu ona.
“Ami hela besik kedas liña fronteira, maibé ami-nia estrada agora grave tebes, oinsá ami halo movimentu ba-mai, liuliu komunidade sira atu lori produtu lokál ba merkadu difisil tebes,” nia tenik.
Xefe Suku Benjamin rekomenda ba parte kompetente atu konsidera preokupasaun hirak-ne’e hodi rezolve lalais molok tama ba eleisaun parlamentár.
“Ita-nia eleisaun mós besik daudaun ona, ida-ne’e mak governu la rezolve lalais bele difikulta mobilizasaun materiál senstivu ba sentru votasaun no estasaun votu sira, liuliu iha suku sira-ne’ebé área rurál ne’e,” nia dehan.
Rekorda fali katak iha loron 08 fulan-fevereiru ne’e, Ministru Obra Públika, Abel Pires, akompaña hosi Diretór Jerál Estrada no Ponte Prevensaun Kontrolu Cheias (DJEPPKS), Rui Hernâni no Diretora Nasionál Manutensaun no Konservasaun Rodoviaria (DNMKR), Isabel Maria Lay Guterres, halo levantamentu dadus estragu iha estrada nasionál Batugade ba Balibó to’o Maliana nune’e bele halo reabilitasaun ba estrada refere.
Notísia relevante: MOP submete pedidu asesu fundu impréstimu reabilita estrada Batugade-Balibo
Jornálista: Sergio da Cruz
Editór: Evaristo Soares Martins
