DILI, 19 abril 2023 (TATOLI) – Partidu Movimentu Libertasaun Povu Maubere (MLPM), Reis Kadalak dehan iha abertura kampaña iha sede MLPM Bairo Pite kata bainhira povu fó fiar mak MLPM sei loke indústria atu inisia ho fábrika lataria, daun, aikose, iskeru, hena, suru tais, kafé no marmer.
“Ami komprometidu katak atu loke indústria fábrika lataria, fábrika daun, fábrika aikose, fábrika iskeru, fábrika hena, fábrika suru tais, fábrika kafe no mós fábrika marmore iha Timor-Leste hodi bele loke kampu traballu ba timoroan hotu ne’ebé ohin loron la iha servisu”, nia firma.
MLPM revela katak sei fó pensaun ba ema sira ne’ebé mak uluk vota iha referendum, fó pensaun ba vítima funu nian ne’ebé mak to’o agora sira nia direitu ema la rekoñese.
“Bainhira ami manan, ami hakarak fó subsídiu ba hotuhotu iha Timor-Leste katak tinan-tinan fó $ 25 mil hodi harii fila fali sira nia uma lulik ne’ebé mak ema sunu iha funu laran no nesesidade sira seluk tan”, nia dehan.
“Ami mós kompromete atu fó subsídiu ba estudante sira husi pre-primária to’o universidade katak osan ne’ebé mak ami fó ne’e husi $10 to’o $ 50 kada fulan”, nia esplika.
MLPM mós atu fó subsídiu ba ema dezempregu sira kada fulan, ho $100 no mós MLPM mós hakarak hasae kafé nia folin husi $2 ba $7. Prinsípiu MLPM nian mak atu hasai povu maubere husi mukit ba moris di’ak, atu lori edukasaun no saúde hodi hakbesik ba povu.
Kalendáriu ne’ebé Komisaun Nasionál Eleisaun fó sai katak partidu MLPM hahú halo abertura komísiu no door to door iha Bemori maibé ho kestaun seluk MLPM muda fila fali ba sede MLPM iha Bairo Pite nian.
Iha komísiu door to door ne’e akompaña husi observadór ne’ebé mai husi CNE no hetan seguransa másimu husi Polísia Nasionál Timor leste (PNTL).
Jornalista : Felicidade Ximenes
Editór : Zezito Silva
