DILI, 05 Juñu 2026 (TATOLI) – Governu liuhusi Sekretaria Estadu Kooperativa (SEKoop) hili munisípiu haat (4) sai hanesan projetu pilotu ba implementasaun produtu Bafo Kayrala tanba planeia implementa iha programa merenda eskolár.
Diretór Delegasaun Munisipál husi SEKoop, Rui Soares, esplika, programa ida-ne’e nu’udar Planu Asaun Anuál SEkoop nian durante mandatu tinan lima. No hetan ona oritentasuan husi Primeiru-Ministru, Xanana Gusmão, hodi implementa iha merenda eskolár.
Nia esplika Bafo Kayrala, nu’udar merkadoria foun ida, ne’ebé dadaun la’o hela, tinan ne’e kuda ona esktare 189, ba iha époka dahuluk tinan ne’e hahú husi Janeiru-Abríl kolleta ona tonelada 60.
Esforsu ne’ebé SEKoop halo hodi implementa produtu ne’e iha programa merenda eskolár maka, SEKoop liuhusi Diresaun Nasionál Promosaun kontinua halo sosializasaun ba eskola sira kona-ba vajnatjen husi produtu ne’e no oinsá fó benefísiu be estudante sira. Sosializasaun ne’e rasik halo ona ba munisípiu 12 inklui Oekusi.
“Ita halo hotu ona promosaun agora ita prepara hela hein implementa ba iha merenda eskolár, tuir planu munisípiu ne’ebé sai pilotu implementasaun ne’e mak hanesan Ermera, Manatutu, Kovalima no Aileu, ita implementa ne’e tuir númeru má-nutrisaun sa’e maka’as, maibé mós bele mudansa,” Rui Soares, hateten ba Tatoli, iha nia knaar-fatin, ohin.
Nia dehan, munisípiu hothotu hakarak atu implementa hotu, maibé tenke deside munisípiu balu mak sai pilotu tanba, haree filafali ba produsaun rasik ne’ebé seidauk bele kobre hotu.
Diretór Rui rekoñese katak produsaun atuál seidauk bele responde ba demanda merkadu, tanba merkadu husu barak, maibé produtór prodús seidauk atinje tarjetu.
Nia dehan importante tebes implementa produtu ne’e iha merenda eskolár tanba, Bafo Kayrala ne’e ai-han ne’ebé “serba bisa” tanba kain bele halo masin-midar no kecap, tahan bele halo sai animál nia hahán, no isin bele halo dosi, bolu, foos, trigu.
Nia adianta, ho demanda ne’ebé iha SEKoop planu ona futuru mai produtu ne’e kuda sei espande ba área kultivasaun ektare 500, hodi responde ba demanda merkadu nian.
Jornalista: Arminda Fonseca
Editór: Evaristo Soares Martins
