BOBONARO, 28 outubru 2022 (TATOLI)-Prezidente Autoridade Munisípiu Bobonaro (PAM), Ernesto de Oliveira Barreto, husu joven sira-ne’ebé envolve iha Grupu arte-marsiál, atu labele hamosu disturbiu iha selebrasaun loron Finadu ne’ebé monu iha 2 fulan-novembru tinan 2022.
Ernesto afirma, finadu sai hanesan kultura Timor-Leste nia ne’ebé kada tinan sempre selebra iha fatin hotu-hotu, sunu-lilin no kari-aifuan hodi hanoin hikas matebian sira.
Notísia relevante: Komandante PNTL Bobonaro husu arte-marsiál respeita membru polísia sira
“Hau hakarak fó mensajen ba juventude sira iha munisípiu ida-ne’e nia laran, iha loron 2 Novembru ne’e labele kria distribuisaun, labele kria problema iha públiku, tanba organizasaun hotu-hotu estadu rekoñese ona, entaun juventude hotu tenke koopera ho estadu,” nia imforma ba jornalista sira, iha Maliana, sesta ne’e.
“Ita ema umanu ne’ebé iha hanoin, ita atu halo buat sira-ne’e tenke hanoin, liuliu iha inan-aman sira-nia leet, ita selebra loron matebian ne’e tinan ida dalan ida, ita mai konsentra hamutuk tan ita hadomi ita-nia matebian sira, la’ós mai halo problema,” Ernesto hateten.
Nia husu mós ba Bobonaro oan sira ne’ebé hela iha Dili no munisípiu seluk bainhira viajen karik tenke la’o ho kuidadu nune’e bele prevene-aan hosi asidente tráfegu.
Komandante Polísia Nasionál Timor-Leste, Munisípiu Bobonaro, Superintendente Atoninho Mauluta, orienta membru Task-Force serbisu hamutuk ho Batallaun Orden Públiku (BOP, sigla portugués) no FALINTIL-Forsa Defeza Timor-Leste (F-FDTL) atu halo patrullamentu másimu iha loron finádu.
“Ita iha Maliana, ita indika iha área balu maka ita konsidera katak iha problema, entaun ita lori prepara aan seguransa,biha buat ruma karik ami mós iha koordenasaun ho BOP Forsa Defeza. Sira-ne’e mak forsa últimu iha buat ruma karik sira sei atua,” Mauluta hateten.
Notísia relevante: PDHJ Maliana no instituisaun relevante sei kontrola veíkulu estadu iha outubru
Jornalista: Sérgio da Cruz
Editór:Evaristo Soares Martins
