MALIANA, 19 setembru 2023 (TATOLI) – Prezidente Autoridade Munisípiu (PAM) Bobonaro, Ernesto de Oliveira Barreto, husu ba Organizasaun Arte-Marsiál (OAM) sira-ne’ebé eziste iha Bobonaro atu hakribi violénsia hodi kontribui ba pás no estabilidade iha rai-laran.
Ernesto hato’o asuntu ne’e tanba deklarasaun Vise-Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Calisto dos Santos Coliati, iha Odelgomo, katak bazea ba estratéjia militár kona-bá ameasa boot ba Repúblika Demokrátika Timor-Leste (RDTL) iha futuru, invazór sira foun laiha ona, ameasa externa rai laran ne’ebé perigu laiha ona, só iha ameasa boot ba RDTL iha futuru mak arte-marsiál sira.
“Jenerál nia liafuan ne’e, simples, maibé liafuan ne’e kasar, kuidadu, ema jenerál la naran ko’alia arbiru iha públiku, tanba ne’e ha’u husu ba joven sira, ema baku ita-nia ema raan, sé nia mate, lei mak bele rezolve, labele rame-rame, tau farda ba baku ema, sunu ema-nia uma, ne’e tenke hapara ona,” nia hateten iha iha Bobonaro, tersa ne’e.
Ernesto argumenta, bainhira envolve iha arte-marsiál atu halo defeza de onra bainhira hetan ameasa ruma hosi individu ka grupu ruma.
“Buat ida pendekar ne’e ninia dalan loloos mak hanesan, ema baku ita dala-ida, keta lai, dala-rua keta lai, dala tolu ona mak halo asaun, maibé ita-nia lae, ema foin haree de’it nia mós, nia hateten hoi nusá o nantan ha’u, ne’e lójika laiha,” nia tenik.
Nia apela ba líder komunitária sira no lia-na’in sira atu tuur hamutuk ho líder arte-marsiál sira iha idak-idak nia suku hodi fó morál no motivasaun ba jove sira atu evita violénsia.
Notísia relevante: Coliati apela ba joven sira labele envolve arte-marsiál
Jornalista : Sérgio da Cruz
Editór : Evaristo Soares Martins
