OÉ-CUSSE 14 abríl 2023 (TATOLI) – Partidu polítiku 16 to’o oras ne’e seidauk hatama kalendáriu kona-ba mini kampaña iha Rejiaun Administrativa Espesiál Oé-Cusse (RAEOA), tanba atu realiza mini kampaña tenke hetan autorizasaun hosi Komisaun Nasionál Nasionál Eleisaun (CNE, sigla portugés).
Diretór CNE RAEOA, Tomás Oqui Meta, informa, daudaun ne’e só partidu FRETILIN de’it mak submete ona kaléndariu mini kampaña hodi hetan aprovasaun ba realizasaun mini kampaña iha RAEOA.
Enkuantu partidu 16 seluk, to’o agora seidauk hatama kaléndariu mini kampaña, maske parte CNE koordena beibeik ona, tán ne’e CNE sei la autoriza atu realiza mini kampaña iha nível suku no aldeia.
Notísia relevante: CNE Oé-Cusse ensera edukasaun sívika no husu kontribui pás-estabilidade
“Ami kontinua fó oportunidade ba partidu sira-seluk atu submete kalendáriu mai iha CNE, ohin loron ikus, só iha de’it partidu FRETILIN mak hatama kaléndariu atu realiza mini kampaña, partidu 16 seluk seidauk, sei la hatama CNE sei la autoriza mini kampaña iha suku no iha bairru,” Tomás Oqui Meta, ko’alia iha Oé-Cusse, sesta ne’e.
CNE sei koordena ho komandu PNTL rejionál atu kontrola no halo supervizaun, kaléndariu mini kampaña FRETILIN nian, CNE sei manda ba nasionál atu hetan aprovasaun.
“Ha’u komunika ona ho estrutura rejionál partidu 16 maibé to’o ohin loron seidauk iha informasaun, tanba ne’e CNE fó tempu loron rua tenke hatama kalendáriu, atu submete ba nasionál hodi hetan aprovasaun, sei lahatama, ami sei la autoriza,” nia afirma.
Nia fó hanoin ba partidu polítiku sira katak, objetivu submete kalendáriu mini kampaña ne’e, primeiru, atu realiza mini kampaña sei hetan seguransa hosi PNTL no observadór nasionál hosi CNE no observadór internasionál inklui órgaun independente sira hanesan justisa nian.
Daruak, autoridade komunitária sei akompaña hodi tau matan ba atividade mini kampaña ne’ebé hakarak realiza iha suku ka aldeia no bairru.
“Signifika mini kampaña ne’e garantidu tanba hetan legalidade, laiha violénsia no instabilidade, maibé kuandu laiha koñesimentu liuhosi kalendáriu, bainhira akontese konflitu, CNE no PNTL mós lahatene, ami fase liman tanba sala ne’e hosi partidu rasik lakohi la submete karta koñesimentu ka kaléndariu, maibé sei iha, entaun hetan seguransa hala’o atividade ho livre laiha limitasaun hosi autoridade kompetente,” nia fó hanoin.
Tuir nia, daudaun ne’e partidu hotu-hotu komesa kontaktu militante sira iha baze, idak-idak hasa’e bendeira partidu iha uma oin, hafuhu malu sei akontese, nune’e bainhira hala’o mini kampaña, karik akontese tuda malu, ataka malu, seguransa mós laiha atu asegura no laiha observadór.
Notísia relevante: Ofisiál supervizaun eleitorál 117 hahú tuir formasaun iha Oé-Cusse
Jornalista : Abílio Elo Nini
Editór : Evaristo Soares Martins
