DILI, 05 abríl 2023 (TATOLI)—Iha plenária ekstraordiánaria ne’ebé Komisaun Nasionál Eleisaun (CNE, sigla portugés) realisa, kuarta neé, hamutuk ho Sekretariadu Tékniku Administrasa Eleitorál (STAE) ho partidu polítiku sira, aprova modelu bulletin votu ne’ebé iha partidu polítika neen (6) mak uza lider partidu nia imajen no bandeira ba eleisaun parlamentár 2023.
Notísia Relevante: Prezidente Repúblika dekreta loron eleisaun Parlamentár iha 21 maiu
Partidu neen (6) ne’ebé lider nia imajen mak partidu ho númeru sorteiu rua (2) Partidu Liberta Povu Aileba (PLPA), partidu ho númeru sorteiu tolu (3) Partidu Libertasaun Popular (PLP), partidu ho númeru sorteiu sia (9) Partidu Republikana (PR), partidu ho númeru sorteiu 12 Partidu Congresso Nacional de Reconstrução de Timor-Leste (CNRT), partidu ho númeru sorteiu 15 Partidu Socialista de Timor-Leste (PST) no partidu ho númeru sorteiu 16 Partidu Democrata Cristão (PDC).
Prezidente Komisaun Nasionál Eleisaun (CNE), José Agostinho da Costa Belo, hateten buletin votu ne’e labele uza fali simbólu rejiaun ne’ebé iha ka patrimóniu.
“Ita-boot sira atu utiliza bandeira sigla no simblu sira-ne’ebé eleitór sira koñese ona atu fasilita vota karik vota ho rasionál no vota ho responsabilidade. Buletin votu ne’e labele uza fali simbólu rejiaun ne’ebé iha. Ita-nia kostume sira-ne’ebé sente katak patrimóniu ita-nian hotu labele utiliza ba ita-nia privadu no labele uza fali partidu sira seluk nia simbólu. Tanba ne’e, proposta ne’e direitamente ita-boot sira, liuhosi STAE atu halo ninia dezeñu no haree didi’ak,” Prezidente CNE neé hateten ba jornalista sira hafoin aprova buletin votu, iha salaun Laline Larigutu.
Diretór Jerál STAE, Acilino Manuel Branco, hateten ohin STAE mai ho modelu proposta ne’ebé mak STAE aprezenta, no parte hotu konkorda no asina plaka hodi lansa no emprime buletin votu.
“Ohin ami mai ho modelu proposta rua mak ida hateten katak iha denumenasaun, sigla, bandeira ka imblema, no ida fali atu konsidera saida mak Tribunál Rekursu halo katak sekuensia denumenasaun ne’e ho rezultadu sorteiu ne’ebé mak iha mak tau númeru, entaun ami propoin ida ho modelu ne’ebé númeru iha,” nia dehan.
Partidu polítiku ne’ebé konkore iha eleisaun parlamentar 2023 hamutuk 17 mak hanesan:
- Partido do Desenvolvimento Nacional (PDN)
- Partido Liberta Povo Aileba (PLPA)
- Partido da Libertação Popular (PLP)
- Partido Democrático (PD)
- Partidu Kmanek Haburas Unidade Nacional Timor Oan (KHUNTO)
- Partido os Verdes de Timor (PVT)
- Partido União Democrática Timorense (UDT)
- Partido da Unidade de Desenvolvimento Democrático (PUDD)
- Partido Republicano (PR)
- Partido Unidade Nacional da Democrática da Resistência Timorense (UNDERTIM)
- Partido Frente Revolucionária de Timor-Leste Independente (FRETILIN)
- Partido Congresso Nacional de Reconstrução de Timor-Leste (CNRT)
- Partido Centro Ação Social Democrata Timorense (CASDT)
- Partido Movimento da Libertação do Povo Maubere (MLPM)
- Partido Socialista Timorense (PST)
- Partido Democrata Cristão (PDC)
- Partido Associação Popular Monarquia Timorense (APMT).
Notísia Relevante: STAE Baucau husu eleitór sira vota ho loloos iha 19 abríl
Jornalista : Osória Marques
Editór : Cancio Ximenes
