BAUCAU, 13 juñu 2023 (TATOLI) – Projetu Konstrusaun no Reabilitasaun Eskolár (PKRE) tinan-ne’e iha munisipál Baucau sei hahú fulan-jullu.
Dire Servisu Munisipál Edukasaun Baucau, Augosto Ornai Ximenes, esplika, projetu refere hamutuk 11 ne’ebé tinan ne’e sei fó prioridade ba eskola pre-eskolár no tuir planu totál grupu komunitária 11 sei tuir formasaun hosi diresaun nasionál parke eskolár Ministériu Edukasaun, Juventude no Desportu.
“Aban diresaun nasionál Edukasaun sei fó formasaun ba grupu komunitária kona-ba matadalan implementasaun nune’e inisiu fulan-jullu bele hahú implementa ona,” Diretór Servisu Munisipál Edukasaun Baucau informa ba Agência TATOLI iha Vila Nova, tersa ne’e.
Antes ne’e projetu PKRE ba tinan-ne’e hamutuk 14, maibé eskola tolu mak kansela komposta hosi eskola rua hosi Katolika ne’ebé parte governu ho Igreja iha akordu subsidiu no pre-eskolár Letemumu failla tenika tanba tarde dezeñu.
Nune’e PKRE tinan-ne’e hamutuk 11 kompostu pre-eskolár Haudere, pre-eskolár Lebenei postu Baguia, pre-eskolár Abulir, EBF primeiru no segundu siklu, EBF Sarabata, Eskola Sekundária Laisorulai postu Quelicai.
Edukasaun pre-eskolár Bercoli, EBF Uaimanuboe postu Venilale, pre-eskolár Buibau, Eskola Sekundária Aubaca no Eskola Sekundária númeru 1 postu Baucau Vila.
“Sei iha preokupasaun barak, masmke la rezolve maibé pelumenus redus,” Augosto Ximenes akresenta.
Hosi projeitu 11 refere sei utiliza orsamentu hamutuk milaun $1.2 no projetu 10 mak konstrusaun foun, enkuantu Eskola Ensinu Sekundária númeru 1 Baucau Vila mak reabilitasaun liuliu kondisaun kakuluk no sala profesór.
Jornalista : Natalino Belo
Editór : Evaristo Soares Martins
