BAUCAU, 17 maiu 2024 (TATOLI) – Komandu Polísia Nasionál Timor-Leste (PNTL) munisípiu Baucau, kinta ne’e investiga sidadaun na’in-ida ne’ebé ameasa atu sunu tán ekipamentu pezadu iha postu administrativu Quelicai, munísipiu Baucau.
Komandante PNTL Munisípiu Baucau, Superintendente Xefe, Antoninho Mauluta, esplika, sidadaun referida tenta ameasa responsável kompañia Chongqin International Construction, ne’ebé halo serbisu reabilitasaun estrada diresaun Quelicai-Ossu semana-ne’e liuhusi telefónika.
“Ita hetan tán balun ne’ebé liuhusi telefone ameasa nafatin xineza sira. Nia hateten katak, atu sunu tan sasán sira,” Komandante PNTL Munisípiu Baucau hateten iha Vila Nova, sesta ne’e.
Hafoin hetan ameasa, parte kompañia hato’o keixa hamutuk ho evidénsia balun ba Komandu PNTL Baucau, nunee iha loron-kinta, 16 maiu 2024 Servisu Investigasaun Kriminál (SIN) halo kedas identifikasaun ba sidadaun ne’e.
Komandu Polísia husu apoia ba empreza telekomunikasaun hanesan Telemor, Telkomcel inklui Timor Telekom, hodi buka tan evidénsia hanesan gravasaun hodi sai evidénsia tanba kazu referida akontese liuhusi telefónika.
“Ema-ne’e agora ita identifika no akompaña hela nia pozisaun, hein ba prosesu, nia identidade ami labele ko’alia lai, tanba sei hein prosesu,” Superintendente Xefe, Antoninho Mauluta akresenta.
Antes ne’e, PNTL Baucau halo ona investigasaun ba sidadaun na’in-tolu ho inisiál DN, A no JSG, tanba deskonfia nu’udar autór ba kazu sunu eskavadór iha área Arleuisi, suku Lakuliu iha loron-13 maiu 2024, kazu ne’e aprezenta ona ba Ministériu Públiku ho akuzasaun danu agravadu.
Notísia relevante: PNTL Baucau suspeita autór na’in-tolu ba kazu sunu ekipamentu pezadu iha Baucau
Jornalista : Natalino Belo
Editór : Evaristo Soares Martins
