iklan

BAUCAU, HEADLINE, MUNISÍPIU, SEGURANSA

PNTL Baucau suspeita autór na’in-tolu ba kazu sunu ekipamentu pezadu iha Baucau

PNTL Baucau suspeita autór na’in-tolu ba kazu sunu ekipamentu pezadu iha Baucau

Eskavadór ne'ebé hetan sunu husi ema deskoñesidu iha área Arleuisi, suku Lakuliu, postu administrativu Quelicai, munísipiu Baucau. Foto espesiál.

BAUCAU, 13 maiu 2024 (TATOLI) – Komandu Polísia Nasionál Timor-Leste (PNTL) munisípiu Baucau suspeita autór na’in-tolu ba kazu sunu eskavadór iha área Arleuisi, suku Lakuliu, postu administrativu Quelicai, munísipiu Baucau.

Komandante PNTL Munisípiu Baucau, Superintendente Xefe Antoninho Mauluta, esplika, ekipamentu pezadu hetan sunu husi ema deskoñesidu, oras 05:00 madrugada iha loron domingu, 12 maiu 2024.

“Ita prosesa hela no iha faze identifikasaun, suspeitu balun mos ami deteta, inklui seguransa na’in-ida hamutuk nain-tolu,” Komandante PNTL Munisípiu Baucau hateten iha Vila Nova, segunda ne’e.

Bainhira kazu referida akontese, PNTL liuhusi eskuadra postu Quelicai hamutuk ho Servisu Investigasaun Kriminál (SIC, sigla portugés) halo kedas identifikasaun ba traballadór inklui seguransa iha fatin akontesimentu.

Eskavadór referida, hetan sunu tanba laiha pesoál seguransa iha terrenu, maske halao kna’ar tuir deskrisaun serbisu hodi hein ekipamentu pezadu relasiona ho projetu reabilitasaun estrada diresaun Quelicai ba Ossu, munisípiu Viquque.

Suspeita na’in-tolu ba kazu sunu eskavavór maihusi sidadaun Quelicai ho inisiál hanesan DN, A no JSG tanba deskofia envolve iha kazu referida.

“Ita deskonfia, tanba ema kontratu nia, akontesimentu ne’e nein iha informasaun, enkuantu na’in-rua seluk nu’udar eis traballdór,” Superintendente Xefe Antoninho Mauluta akresenta.

Komandu Polísia Baucau husu parte Ministériu Publiku (MP) atu aselera prosesu hanesan fó-sai mandadu detensaun nune’e bele prosesu iha tribunál ho ketegoria danu agravadu.

Komandu PNTL Baucau kontinua orienta ba Polísia Eskuadra sira no Ofisiál Polisiamentu Suku (OPS) sira atu servisu hamutuk ho Autoridade Postu no suku inklui parte kompañia iha terrenu, nune’e prosesu reabilitasaun estrada bele finaliza ho diak, tuir kontratu ne’ebé determina ona.

Aliende ne’e, husu ba komunidade hotu atu kontribui ba prosesu dezenvolvimentu sira, tanba Governu kontrata kompañia internasionál halo reabilitasaun estrada hodi lori dezenvolvimentu iha munísipiu Baucau.

Ekipamentu pezadu ne’ebé sunu na’in mak kompañia Chongqin International Construction, ne’ebé mak utiliza hodi hala’o projetu reabilitasaun estrada diresaun postu administrativu Quelicai to’o suku Nahareca, postu administrativu Ossu, munisípiu Baucau.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!