DILI, 31 Jullu 2025 (TATOLI)—Komandu Polísia Nasionál Timor-Leste (PNTL) Munisípiu Baukau halo apreensaun ba kilat-anin hamutuk lima ne’ebé envolve suspeitu na’in-rua iha área Lekiloiwatu, Suku Triloka, Postu Administrativu Baukau Vila, Munisípiu Baukau.
Tuir kronolojia, kazu referidu akontese bainhira sidadaun na’in-rua ho inisiál IF no RS transporta kilat hirak-ne’e atu fa’an ba sidadaun inisiál A maibé serbisu intelejénsia informa ba Komandu Polísia hodi halo apreensaun iha lokál krime, Segunda (28/07).
“Ema na’in-rua ne’e lori atu fa’an ba ida seluk. Tempu ne’ebá ita-nia Polísia Investigasaun asegura mai ita-nia fatin,” Komandante PNTL Baukau, Superintendente João Sancho Pires hateten iha ninia kna’ar fatin, Kinta ne’e.
Aleinde apreende kilat lima, Pires informa, PNTL mós asegura evidénsia seluk hanesan motór no evakua sidadaun na’in-tolu referidu ba Komandu Polísia iha-ne’ebé liuhosi investigasaun deklara kilat hirak-ne’e sira fa’an bainhira hatama husi sidadaun insiál AC ne’ebé nu’udár na’in.
“Ita mós husu mandadu ba prokuradór, nune’e buka tuir autór loloos,” João Sancho Pires esklarese.
Entretantu, kazu ne’e rejistadu ona iha Ministeriu Públiku ho numéru Nuc 0058/BCIC hodi kontinua prosesa inklui buka tuir AC tanba konsidera kazu ne’e kontra Lei Nú. 05/2017 kona-ba Arma Branka tanba fó prejuizu ba ema-nia vida.
Jornalista: Natalino Belo
Editór: Xisto Freitas da Piedade
