VIQUEQUE, 01 agostu 2022 (TATOLI)—Postu saúde suku Fatudere, postu Viqueque vila, munisípiu Viqueque, presiza fasilidade oxizéniu hodi fó atendimentu ba pasiente sira tanba durante ne’e laiha.
“Ami laiha fasilidade oxizéniu, ami presiza tebes hodi fó atendimentu ba pasiente sira. oxizéniu ne’e importante hanesan moras sira ne’ebé halo estabilizasaun ba pasiente sira, maibé agora laiha ne’e hanesan difikuldade no distánsia ba internamentu Viqueque vila ne’e dook,” Doutora postu saúde Fatudere, Marciana Soares Perreira, hateten ba Agência Tatoli, iha postu saúde Fatudere, segunda ne’e.
Notísia relevante: Japaun apoia fundu harii postu saúde iha suku Uaimori Viqueque
Antes ne’e, parte postu saúde hato’o ona pedidu ba saúde munisípiu, maibé to’o agora seidauk iha resposta ruma.
Enkuantu, fasilidade seluk iha postu saúde ne’e hanesan kama, ekipamentu médiku no ai-moruk sei sufisiente hodi halo atendimentu ba pasiente sira.
Aleinde ne’e, postu saúde Fatudere rejista moras Infeksaun Sistema Respiratóriu (ISPA) ho totál 40 resin durante fulan-juñu no jullu, rejista mós moras sira seluk hanesan isin moras, dermátika, inklui diarreia.
“Ai-moruk sufisiente hela tanba kada fulan ami sempre halo pedidu ba farmásia internamentu Viqueque, maibé foin lalais ne’e stock ai-moruk parcetamol maka hotu tanba fahe hotu ba ema sira ne’ebé simu vasina Pfizer, maibé agora stock iha fali ona,” nia akresenta.
Durante ne’e, postu saúde Fatudere fó atendimentu ba komunidade suku Fatudere no Maluru, ne’ebé hela besik iha postu saúde.
“Durante ne’e ami fó hotu atendimentu ba komunidade sira sira ne’ebé presiza atendimentu hosi pesoál saúde tanba fasilidade saúde ne’e ba ema hotu la’ós suku Fatudere de’it,” nia tenik.
Tuir dadus, abitante hosi suku Fatudere hamutuk na’in-662, pesoál saúde ne’ebé hala’o serbisu iha postu saúde Fatudere iha haat, kompostu hosi médiku ida, enfermeira rua, saúde públika ida.
Iha fatin hanesan, Pasiente hosi suku Fatudere, Zélia Lopes, haktuir, durante ne’e pesoál saúde sira fó atendimentu di’ak tanba dala ruma fó atendimentu to’o komunidade nia uma.
“Ami haree durante ne’e pesoál saúde sira serbisu di’ak, atende lalais komunidade no dala ruma komunidade moras iha uma sira ba tuir hodi fó tratamentu ba pasiente sira,” nia dehan.
Jornalista : Vitorino Lopes da Costa
Editora : Julia Chatarina
