DÍLI, 14 Jullu 2026 (TATOLI) – Sekretaria Estadu ba Asuntu Toponímia no Organizasaun Urbana (SEATOU), hamutuk ho Autoridade Munisípiu Díli (PAM-Díli), halo despeju administrativu ba uma-kain 57 iha Aldeia Beto Tasi, Suku Madohi, Postu Administrativu Dom Aleixo, Munisípiu Díli, atu hamamuk ba projetu expansaun Aeroportu Internasionál Nicolau Lobato.
Prezidente Autoridade Munisípiu Díli, Francisco dos Santos, hateten medida ne’e implementa tanba autoridade sira fó ona notifikasaun ba proprietáriu sira atu hamamuk fatin, maibé uma-kain balu seidauk kumpre orientasaun ne’ebé Governu fó.
Nia hateten katak, notifikasaun fó ona desde inísiu fulan Marsu, maibe komunidade balun la kumpri, tanba ne’e ekipa konjunta foti desizaun hodi halo despeju administrativu iha tersa ne’e.
“Planu inisiál mak halo despeju iha loron 5 Jullu. Maibé Governu fó tan tempu loron 10 atu proprietáriu sira bele hamamuk rasik sira-nia uma. Balu koopera, maibé balu seluk lakohi,” dehan Francisco ba jornalista sira iha Beto Tasi, ohin.
Nia dehan Governu presiza kontinua implementa projetu expansaun aeroportu tanba konsidera infraestrutura ida-ne’e importante ba dezenvolvimentu nasaun.
Francisco haktuir katak ba família sira ne’ebé hakarak fila ba sira nia munisípiu, SEATOU sei fasilita transporte, liu-liu Lautém no Manatuto.
Entretanto, Helder da Silva, nu’udar membru ida husi komunidade ne’ebé hetan despeju administrativu espresa nia sentimentu triste no husu governu atu aselera prosesu indemnizasaun ba uma no ai-horis sira.
“Ami nudar sidadaun babain apoia dezenvolvimentu nasionál no prontu atu entrega rai ne’e ba interese públiku. Maibé ami triste tanba to’o agora Governu seidauk selu indemnizasaun,” dehan nia.
Iha fatin hanesan, Xefe Suku Madohi, Bernardino de Cristu Pereira, hateten nia parte sei kontinua halo esforsu atu ajuda uma-kain 57 ne’ebé afetadu hodi hetan indemnizasaun.
“Ami rekolla ona dokumentu relevante husi uma-kain 57 ne’ebé afetadu no submete ona ba Ministériu Obras Públikas. Ami fiar katak Governu sei prosesa no selu indemnizasaun iha tempu badak,” dehan Bernardino.
Jornalista: Camilio de Sousa
Editór: Filomeno Martins
