OÉ-CUSS,E 11 marsu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Administrasaun, Andre Lao, promete sei kria kondisaun hodi hasoru polítika implementasau podér lokál no desentralizasaun administrativa iha futuru.
“Hafoin kompleta ona estrutura autoridade komunitáriu, hahú hosi Konsellu Suku 18 to’o jestór sub-rejiaun haat, planu tuir mai ha’u sei konvida entidade hotu hodi prepara ba polítika implementasaun podér lokál,” Andre Lao, ko’alia iha otél Ambeno Oé-Cusse, iha ambitu serimónia pose ba jestór Pante Makasar, sábadu ne’e.
Notísia relevante: Autoridade Munisípiu tenke hahú prepara kondisaun hodi hasoru polítika podér lokál
Membru Autoridade ne’e, fundamenta, atividade pose ba jestór sub-rejiaun haat Oésilo, Pássabe, Nítibe no Pante Makasar, kompleta ona, tanba ne’e nu’udar programa dahuluk, hosi Sekretáriu Rejionál Asuntu Adminitrasaun nian, kona-bá funsionamentu instituisaun no administrasaun públika.
“Tan ne’e programa tuir mai, ami sei konsentra hamutuk koopera ho Konsellu Suku 18, atu haree programa kona-bá estabelesimentu suku foun, atu kria kondisaun ba futuru implementasaun polítika desentralizasaun no podér lokál,” nia promete.
Tuir nia, desentralizasaun administrativa nu’udar oportunidade úniku atu promove dezenvolvimentu lokál ho koezaun terrtoriál, ida-ne’e atu perante sidadaun hotu nia direitu partisipasaun ativa iha konstrusaun ba futuru pás nian.
“Ha’u hanoin desentralizasaun administrativa, ne’e la’ós servisu simples no lais, presiza ema hotu nia apoia, no investimentu iha kapasitasaun infraestrutura no mekanizmu presta apoia ba funsionamentu munisipál nian,” nia katak.
Nune’e, nia dehan, faze preparasaun tenks hahú kedas hosi estabelesimentu suku no aldeia, atu hatene kuantidade no kualidade servisu iha RAEOA, tanba ne’e, nu’udar Sekretáriu Rejionál Asuntu Administrasaun, sei koordena ho komponente hotu tanba preparasaun ba polítika desentralizasaun no podér lokál presiza ema hotu nia apoia.
“Ha’u tenke koopera hamutuk ho entidade hotu, intelektuál hotu mai hosi suku 18, atubele koopera ho ha’u, atu ita tau hanoin hamutuk, atu dezenvolve Oé-Cusse ne’e ba oin, agora ita hamutuk ho aman fundadór nasaun, nu’udar Prezidente Autoridade, ita hotu sei hamutuk dezenvolve Oé-Cusse,” nia katak.
Notísia relevante:Poder lokál no desentralizasaun administrativa sai prioridade IX Governu
Jornalista: Abílio Elo Nini
Editór: Evaristo Soares Martins
