DILI, 09 Outubru 2025 (TATOLI) – Komisaun A ba trata asuntu Konstitusionál no Justisa iha Parlamentu Nasionál sujere atu Rejime Jurídiku foun ba Titularidade Rai presiza proteje investidór estranjeiru sira iha Timor-Leste.
Vise-Prezidente Komisaun A, António Verdial de Sousa, dehan mezmu iha ona Lei ba Rai númeru 13/2017, 05 Maiu, kona-ba Rejime Espesiál Define Titularidade Bens Imóveis, maibé durante ne’e seidauk implementa ho di’ak. Nune’e, nia husu tenke garante seguransa jurídika ba investidór hodi iha estatutu rai ne’ebé klaru atu hala’o investimentu.
Deputadu KHUNTO ne’e solisita atu ho rejime foun ne’e tau atensaun ba kestaun prosesu administrativu ho loloos ba rekizitu sira hodi sidadaun rekere atu hetan sertifikadu ba rai.
Aleinde ne’e, presiza tau atensaun atu regulariza didi’ak Estadu nia bens no moveis, liuliu arrendamentu atu aumenta kollesaun reseita ba Estadu.
“Tanba ne’e, ho rejime foun [ba Ministériu Justisa] presiza halo semináriu nasionál hodi bele rona mós hanoin husi entidade sira seluk, atu prodús lejislasaun ida sustentavel”, nia hato’o.
Iha fatin hanesan, Prezidente Komisaun A, Patrocínio dos Reis Fernandes, dehan problema rai kompleksu tebes, mezmu iha ona Lei ba Rai no lejislasaun sira seluk seidauk fó solusaun ho di’ak. Tanba ne’e, pozitivu tebes ho rejime foun ne’e bele fó solusaun.
Deputadu CNRT ne’e adianta katak Parlamentu prontu kontribui ba hanoin no paresér bainhira simu inisiativa foun ne’e.
Komisaun antes ne’e simu petisaun no keixa husi komunidade liga ho disputa rai, no fiskalizasaun iha baze identifika autoridade kompetente seidauk halo sensibilizasaun másima kona-ba Lei ba Rai ba komunidade.
Relembra katak, iha 03 Setembru, Ministru Justisa, Sérgio Hornai, aprezenta ba Konsellu Ministru kona-ba Dekretu-Lei Rejime Jurídiku foun ba Titularidade Rai, hodi hetan apresiasaun husi ezekutivu sira.
Diploma ne’e ho objetivu bele regulariza liután Rejime Jurídiku Domíniu Privadu Estadu no Domíniu Públiku Estadu. Ministériu Justusa sei halo konsulta ho ministériu relevante hodi husu sira-nia paresér.
Notísiarelevante: https://tatoli.tl/2025/09/03/mj-presiza-halo-konsultasaun-rejime-juridiku-foun-ba-titularidade-rai/
Jornalista: Nelson de Sousa
Editora: Maria Auxiliadora
