COVALIMA, 18 jullu 2023 (TATOLI)–Servisu Munisipál Obra Públika (SMOP) Munisípiu Covalima akompañadu hosi ekipa Nasionál hala’o ona lavantamentu dadus ba dezastre naturál (udan boot iha 3-4 jullu) ne’ebé estraga ponte no estrada iha Covalima.
Notísia Relevante: Bee-mota Rai Ketan lori-sasurut uma tolu iha suku Labarai
“Ekipa hosi Nasionál mai ona no ohin ami hahú halo lavantamentu dadus ba estrada no ponte ne’ebé hetan estragu hosi dezastre natural. Tanba, ekipa nasionál halo lavantamentu bazeia ba ami-nia relatóriu ne’ebé ami haruka ba nasionál,” Diretór Servisu Munisipál Obra Públika Covalima, Alberto Cardoso, hateten ba Agência Tatoli iha nia kna’ar fatin, Santa Rosa, tersa ne’e.
Servisu Munisipál Obra Públika simu relatóriu hosi autoridade postu administrativu sira-ne’ebé afeta ba dazastre naturál hodi estraga estrada no ponte iha postu administrativu Fatululik, Zumalai, Maucatar, Suai, Tilomar no Fohorem.
Tuir dadus, durante udan boot iha loron 3-4 fulan-jullu tinan 2023 ne’e iha ponte ne’ebé hetan estragu iha munisípiu Covalima hanesan Ponte Lomea lokaliza iha suku Beco, postu Suai, entre suku Tashilin, postu administrativu Zumalai, ponte Rai Ketan lokaliza iha suku Labarai, postu Suai entre suku Belekasak, postu Maucatar, munisípiu Covalima.
Entertantu, durante udan aleinde dezastre naturál estraga estrada no ponte, halo komunidade sira mós sai vítima tanba dezastre naturál ho tipu rai-halai iha postu administrativu Zumalai estraga komunidade nia uma 54 ne’ebé hetan estragu totál no iha suku Labarai, postu Suai ne’e mota lori-sasurut komunidade nia uma tolu (3) no komunidade nia plantasaun balun.
Notísia Relevante: Governu observa direta fatin akontesimentu dezastre naturál iha Zulo
Jornalista : Celestina Teles
Editór : Cancio Ximenes
