DILI, 28 juñu 2023 (TATOLI) – Ministériu Edukasaun, Juventude no Desportu (MEJD) lakonsege rezolve estututu profesór reklamante 538 ne’ebé tama iha segunda faze, tanba submisaun dadus tarde, nune’e implika ba sira-nian kontratasaun iha Governu Daualuk nian.
“Iha ha’u-nian mandatu, halo esforsu duni atu rezolve estatutu profesór voluntáriu sira ba kontratadu, maibé realidade ha’u la konsege rezolve, tanba iha falla balu mak halo prosesu ne’e sai atrazu”, Ministru Edukasaun, Armindo Maia, hatete iha lansamentu fatuk dahuluk ba konstrusaun edifísiu eskola CAFE iha munisípiu Aileu, tersa ne’e.
Nia dehan profesór reklamante sira seidauk bele hetan direitu nu’udar kontratadu, tanba dadus husi Manufahi mak atrazu atu fó biban ba Ministériu Edukasaun hodi halo levantamentu. Nune’e, nia rekomenda ba IX Governu atu kontinua tau konsiderasaun ba direitu profesór reklamante sira ne’e nian.
“Verifikasaun no reverifikasaun dadus profesór sira-nian iha munisípiu 12 hotu ona, maibé falta ida de’it maka sai problema husi munisípiu Manufahi nian, tanba ita la konsege simu sira-nia lista iha prosesu tomak. Tanba ne’e, ha’u rekomenda ba IX Governu ne’e atu toma hela responsabilidade hodi rezolve direitu profesór sira”, governante ne’e sujere.
Maski lakonsege rezolve problema estatutu profesór voluntáriu 538, maibé ministériu konsege kontratu ona profesór voluntáriu hamutuk 1.700.
Iha sorin seluk, Diretór Edukasaun Munisípiu Manufahi, Trinito Sarmento, informa katak nia la komprende dadus profesór husi Manufahi mak sai problema, tanba antes ne’e submete hotu ona mai nasionál.
“Ita-nian dadus profesór 35 ne’ebé tama iha segunda faze ne’e, ita haruka hotu ona mai nasionál. Agora, problema iha ne’ebé, ha’u mós la hatene tanba saida mak prosesu tarde”, nia kestiona.
Ho problema ne’e, nia husu ba dirijente sira iha edukasaun nasionál atu serbisu nafatin ho responsabilidade hodi aselera prosesu ne’e no buka atu halo kolaborasaun di’ak ho Ezekutivu foun hodi rezolve asuntu ne’e.
Notísia relevante: Edukasaun analiza ona dokumentu profesór reklamante 500 no publika iha tempu badak
Jornalista: Tomé Amado
Editora: Maria Auxiliadora
