Taxa partisipasaun eleisaun parlamentár 2023 atinje 79,28%

DILI, 30 maiu 2023 (TATOLI)–Prezidente Komisaun Nasionál Eleisaun (CNE), José Agostinho da Costa Belo, hateten iha eleisaun lejislativa 2023 ne’e taxa partisipasaun atinje 79,28% kompara ho taxa lartisipasaun eleisaun prezidensiál 2022 sa’e to’o 77,26% de’it.

Notísia Relevante: Taxa partisipasaun eleisaun prezidensiál 2022 sa’e to’o 77,26%

Nia hateten, iha eleisaun parlamentár ne’e votante sira ezerse sira-nia direitu votu maibé iha votu nulu hamutuk 10.222, nune’e CNE no STAE presiza mellora liután edukasaun sívika no edukasaun votante ba eleitór sira.

“Ita-nia taxa partisipasaun iha eleisaun parlamentár 79.28% sa’e liu nasaun boot seluk. Ita-nia partidu polítika 17 ne’e patrimóniu estadu nian. Maibé, ita tenke hili ida labele hili rua ka tolu, tanba kuandu hili rua mak mosu votu nulu kuaze 10.000-resin ne’e. Ida-ne’e hanesan krítika ida ba ami CNE ho STAE mak halo servisu ladún másimu, edukasaun votante no sívika mak seidauk la’o di’ak. Karik, neineik ba beibeik, ita sei halo di’ak,” José Belo hateten iha publikasaun rezultadu provizóriu ba eleisaun parlamentár 2023, iha salaun Laline Larigutu Colmera, Dili, tersa ne’e.

Maibé, nia hateten, CNE mós husu ba partidu polítku sira hotu atu halo edukasaun polítika ba sira-nia militante no simpatizante sira, tanba ida-ne’e mós partisu polítika sira-nia responsabilidade mós.

Komisária Konsellu Nasionál Eleisaun (CNE), Odete Maria Belo, hateten rezultadu provizóriu apuramentu nasionál ba eleisuan parlamentar 21 maiu 2023 ne’e, CNE konklui ona prosesu apuramentu nasionál ho akta provizóriu hanesan totál akta apurada hamutuk 1.472 (100%); totál eleitór rejistadu iha 890.145; totál eleitór tuir votu 705.693; taxa partisipasaun 79%, kompostu hosi feto iha 343.278 (48.64%) no mane 362.415 (51.36%).

Nia hateten, hosi taxa partisipaaun ne’e rezulta votu válidu hamutuk 692.521 (98.13%), votu branku 2.698 (0.38%), votu nulu 10.387 (1.47%), votu rejeitadu 61 (0.01%) no votu reklamante 0 (0,00).

Nune’e, votu válidu ba kada partidu polítiku 17 ne’ebé compete iha eleisaun parlamentár 2023 ne’e, hatudu mak iha rezultadu provizóriu hanesan tuir mai ne’e;

Partidu Dezenvolvimentu Nasionál (PDN) hetan votu 597 (0.1%)
Partidu Libertasaun Popular Aileba (PLPA) 3.272 (0.5%)
Partidu Libertasaun Popular (PLP) 40.720 (5.9%)
Partidu Demokrátiku (PD) 64.517 (9.3%)
Partidu Kmanek Haburas Unidade Nasionál Timor Oan (KHUNTO) 52,031 (7.5%)
Partidu os Verdes Timorense (PVT) 25.106 (3.6%)
Partidu Uniaun Demokrátiku Timor-Leste (UDT) 1.256 (0.2%)
Partidu Unidade Dezenvolvimentu Demokrátiku (PUDD) 21.647 (3.1%)
Partidu Repúblikanu (PR) 1.558 (0.2%)
Partidu Unidade Nasionál Democrática de Resistência Timorense (UNDERTIM) 023 (0.1%)
Partidu Frente Revolucionária de Timor-Leste Independente (FRETILIN) 338 (25.8%)
Partidu Conselho Nacional Reconstrução Timor-Leste (CNRT) 288.289 (41.6%)
Partidu Centro Ação Social Democrata Timor-Leste (CASDT)170 (0.5%)
Partidu Movimentu Libertasaun Povu Maubere (MLPM) 642 (0.1%)
Partidu Sosialista Timorense (PST) 2.415 (0.3%)
Partidu Demokrata Kristaun (PDC) 1.262 (0.2%)
Partidu Assosiasaun Populár Monárkia (APMT) 678 (1.0%).