OEKUSI, 08 Outubru 2025 (TATOLI) – Ajénsia Internasionál PNUD (Programa Nasaun Unida ba Dezenvolvimentu), kuarta ne’e, entrega hikas fasilidade sira ba Autoridade Rejiaun Administrativa Espesiál Oekusi Ambeno (RAEOA) tanba misaun iha Oekusi termina ona.
Fasilidade sira-ne’ebé entrega, parte PNUD rejeita atu esplika no fó sai ba mídia sira iha ámbitu seremónia referida, maibé tuir observasaun Jornalista Ajénsia Tatoli, I.P, observa, ativu (aset) – bens ho valór ekónomiku, ne’ebé PNUD entrega mak hanesan, karreta hilux rua (2), motorizada tipu KLX tolu (3), desktop ida (1), laptop ida, projetór ida inklui dokumentu balun.
Notísia relevante: https://tatoli.tl/2024/10/04/undp-fo-formasaun-ba-autoridade-lokal-hodi-implementa-projetu-infraestrutura-13/
Hafoin entrega, Koordenadór Zona Espesiál Ekonómia Dezenvolvimentu Oekusi Ambeno (ZEEDOA), Herculano Souza, reprezenta Prezidente Autoridade RAEOA, agradese ezisténsia PNUD iha Oekusi dezde 2015 to’o ohin loron, fasilita formasaun, kapasitasaun ba grupu agrikultór sira iha Oekusi.
“Agradese tanba fasilita ona kooperasaun ho Autoridade tinan barak. Ami iha Oekusi haree no sente duni benefísiu husi kooperasaun ne’e –alvu ba komunidade no joven sira, ezemplu grupu ida iha Leolbatan, sira bele prodús ona kafe Lakufoan no sente ona rendimentu. Peskadór sira iha Lifau hetan ona formasaun téknika no asesu ba merkadu, grupu ai-nanas iha suku Usitaqueno, no kreativu seluktan – ida-ne’e benefisíu direita ba povu,” nia hateten, iha salaun Gabinete Prezidente Autoridade Oekusi, ohin.
Tuir nia, loloos, inisiativa sira-ne’e presiza kontinua, tanba ho polítika ne’e bele motiva komunidade sira atu partisipa direita iha dezenvolvimentu no sente rasik rendimentu husi partisipasaun ba atividade sira hanesan ne’e.
Tanba ne’e, nia rekomenda ba Ajénsia PNUD atu konsidera nafatin posibilidade no oportunidade foun ba serbisu hamutuk iha futuru, tanba saida mak tenke inísia ona tenke kontinua.
“Ezemplu kuandu ita husik grupu sira-ne’e, ema ida la tau matan ba sira, entaun investimentu ne’ebé halo ona husi parseiriu sira sei laiha ona kontinuidade ona, entaun ha’u sei relata ba Prezidente Autoridade atu konsidera hanoin sira-ne’e, bele komunika fila-fali ho MNEK no UNDP atu saida mak bele halo tan iha futuru,” nia dehan.
Entretantu, kona-ba fasilidade ne’ebé entrega hikas husi Ajénsia PNUD, agradese tanba maske utiliza tinan barak ona, maibé kondisaun sei garantidu hela, hanesan karreta, motorizada inklui komputadór sira.
Notísia relevante: https://tatoli.tl/2024/10/08/konsellu-suku-ualu-iha-oe-cusse-partisipa-formasaun-molok-implemente-cirep/
Reprezentante PNUD iha Timor-Leste, Brigida Soares, hato’o sentimentu ksolok ba Governu Timor-Leste liuhusi Ministériu Negósiu Estranjeiru no Kooperasaun (MNEK) ho Autoridade RAEOA tanba fasilita ona prosesu transferénsia ativu (aset) ka fasilidade ne’ebé PNUD utiliza ona tinan barak iha Oekusi.
“Ami agradese tebes ba ita kooperasaun durante ne’e di’ak tebes, tanba objetivu prinsipál husi kooperasaun ne’e, dudu ita-nia komunidade sira, atu partisipa direita ba programa sira, atividade barak, nune’e bele muda moris,” nia orgullu.
Entretantu, iha seremónia entrega fasilidade hirak-ne’e, akompaña reprezentante MNEK, Diresaun Patrimóniu Estadu no Diretór Jerál Komisaun Funsaun Públika.
Jornalista: Abílio Elo Nini
Editór: Rafael Ximenes de A. Belo
