UNDP fó formasaun ba autoridade lokál hodi implementa projetu infraestrutura 13
DILI, 04 outubru 2024 (TATOLI)–Projetu Infraestrutura Komunitária ba Rezilénsia (CIREP, sigla Inglés) husi Programa Nasaun Unida ba Dezenvolvimentu (UNDP) organiza formasaun kona-ba Cash for Work ba Autoridade lokál, molok implementa projetu infraestrutura hamutuk 13.
Vise reprezentante Misaun Permenente UNDP nian iha Timor-Leste, Adeline Carrier, hateten programa ida-ne’e ho objetivu aumenta asesu ba serbisu báziku sira hanesan saúde, edukasaun, merkadu, irrigasaun, bee no saneamentu no oportunidade ba serbisu ba prazu badak no naruk atu komunidade sira iha área rurál hadi’a sira-nia moris.
“Iha tinan 2024 ne’e projetu hamutuk 13 mak sei realiza iha munisípiu sira hanesan Bobonaro, Ermera, Liquiça no Rejiaun Administrativu Espesiál Oé-Cusse (RAEOA) atu hadi’a sistema bee no saneamentu, ponte, armazenamentu bee pluviál, moru protesaun no maternidade,” Vise reprezentante Misaun Permenente UNDP nian iha Timor-Leste, Adeline Carrier, hateten ba jornalista sira iha Otel Novu Turizmu.
Reprezentante ne’e garante, tuir kalkulasaun to’o iha 2027 ne’e hamutuk 4.600 membru komunidade sei benefisia ba atividade ne’e no 50% mak feto husi famiíia hamutuk rihun 16 iha munisipiu sira.
Nune’e mós, reprezentante Embaixadór Japaun iha Timor-Leste, Yuki Sakai, hateten Governu Japun halo doasaun ba projetu ne’e ho montante besik millaun $5 no UNDP mós tau osan hamutuk rihun 300 atu implementa projetu ne’e.
“Ita seidauk iha planu ba munisipiu sira seluk, agora ita haree ba munisipiu sira-ne’ebé iha no ita hein susesu ba programa ne’e. Ita sei servisu hamutuk ho autoridade sira atu bele iha susesu ba projetu ne’e,” nia dehan.
Iha fatin hanesan, Jestór ba projetu CIREP, Tito da Costa, hateten partisipante sira apreende kona-ba implementasaun atividade sira no kritériu, planu, seguransa no mitigasaun risku ba projetu ne’e rasik.
“Ita lansa manuál Cash for work ne’ebé ita deskreve prosesu kada pasu atu hadi’a prátika no feramenta monitorizasaun hodi garante kualidade no ba implementasaun efikaz no justa,” nia dehan.
Diretór Nasionál iha Ministériu Administrasaun Estatál (MAE), Elvino Bonaparte, dehan projetu sei fó impaktu pozitivu ba komunidade lokál sira no fó oportunidade atu sira bele partisipa hodi dezenvolve aldeia sira.
“Programa ne’e di’ak atu ajuda ita. Ha’u lori Governu nia naran husu ba ema hotu atu servisu hamutuk, ita solidária ba malu no responsável ba konstrusaun, ita kontrola hamutuk hodi ita hotu bele utiliza,” nia dehan.
Xefe Aldeia Dukurai husi munisipiu Ermera, Ragael Soares Maia, hato’o agradesimentu ba parseiru sira-ne’ebé hili sira nia aldeia atu implementa projetu CIREP atu repara estrada no ponte iha aldeia.
“Popualsaun iha Dukurai hamutuk ema 6.000 no iha aldeia 13. Iha suku ne’e, sei halo konstrusaun hamutuk estrada no ponte hamutuk kilometru ualu (8) iha aldeia haat,” nia dehan.
Projetu CIREP ne’e sei la’o iha durante tinan tolu (3) iha munisipiu lima iha Bobonaro, Covalima, Ermera, Liquiça no RAEOA.
Jornalista : Jesuína Xavier
Editór : Cancio Ximenes
