OÉ-CUSSE, 08 Outubru 2024 (TATOLI) – Programa Nasaun Unida ba Dezenvolvimentu (UNDP) organiza formasaun kona-ba Cash for Work ba Konsellu Suku ualu molok implementa Projetu Infraestrutura Komunitária ba Reziliénsia (CIReP) iha Rejiaun Administrativa Espesiál Oé-Cusse Ambeno (RAEOA).
Konsellu Suku sira ne’ebé tuir formasaun mak iha sub-rejiaun Pante Makasar iha suku tolu iha Costa, Bobokase no Taiboko, iha sub-rejiaun Oésilo mak suku Bobometo, sub-rejiaun Pássabe mak suku Abani no sub-rejiaun Nítibe mak suku Ban-Afi, Lela-Ufe no Bene-Ufe.
Jestór Projetu CIReP, Tito de Jesus Filipe da Costa, informa katak programa ne’e nia objetivu mak atu aumenta asesu ba servisu báziku, liuliu ba setór saúde, edukasaun, agrikultura, atu ajuda komunidade hadi’a sira-nia moris.
“Tanba projetu ne’e komunidade rasik mak sei mobiliza no jere mós, entaun ita persiza halo formasaun, tanba semana kotuk halo ona lansamentu iha Dili. Ohin, ita halo formasaun iha Oé-Cusse. Iha manuál formasaun ne’e importante mak prosesu selesaun ba benefisiáriu sira, tanba iha Oé-Cusse sei implementa, iha tinan ne’e, projetu lima. Entaun, kada projetu iha ema 100 mak sei serbisu”, nia adianta.
Notísia relevante: Suku ualu iha Oé-Cusse sei benefísia infraestrutura bázika 15 husi projetu CIReP
Nia esplika katak formasaun ne’e durante loron rua hodi aprende kona-ba oinsá mak Konsellu Suku bele halo selesaun ba benefisiáriu sira, sasukat saida mak bele halo no labele halo no oinsá ba prosesu pagamentu.
“Matéria sira-ne’e mak tranzmite ba suku alvu sira. Ami espera katak sira aproveita di’ak formasaun ne’e hodi fó susesu ba implementasaun CIReP iha Oé-Cusse. Ami mós iha planu atu halo formasaun ne’e sei separada ho benefisiáriu rasik iha suku alvu sira”, nia hateten.
Nia adianta katak Oé-Cusse sei hetan infraestrutura bázika 15 ne’ebé sei konstrui ho fazeadamente, tanba iha tinan ne’e hahú uluk projetu lima ba suku ualu no 2025 implementa tan projetu lima no to’o 2026 realiza tan projetu lima.
Sekretáriu Rejionál ba Asuntu Administrasaun, André Lao, entrega manuál formasaun ba xefe suku Bene-Ufe, Marcos Meni. Foto Tatoli/Abílio Elo Nini
Sekretáriu Rejionál ba Asuntu Administrasaun, André Lao, konsidera Projetu CIReP importante tanba kuaze atu hanesan mós ho implementa Projetu Programa Nasionál ba Dezenvolvimentu Suku, nune’e persiza fó formasaun, liuliu ba prosesu monitorizasaun no jestaun.
“Oé-Cusse parseria ho UNDP la’ós foin, maibé tinan barak ona. Entaun, formasaun sira hanesan ne’e importante ba ita-nia komunidade atu hatene, tanba ha’u kontente kuandu projetu kada suku persiza ema barak atu serbisu. Entaun, persiza jestaun di’ak, tan ne’e ha’u husu ba imi partisipa didi’ak, hatudu dixplina durante formasaun”, dehan.
Notísia relevante: Japaun-UNDP apoia millaun lima-resin ba projetu CIREP
Projetu Insfraestrutura Komunitária ba Reziliénsia ne’e jere husi Programa Dezenvolvimentu Nasaun Unida no parseria ho Ministériu Administrasaun Estatál (MAE) no Sekretaria Estadu Formasaun Profisionál no Empregu (SEFOPE).
Projetu ne’e ho durasaun tinan haat hahú 2023 no sei termina iha 2027 ho totál orsamentu hamutuk millaun $5,3 ne’ebé finansia husi Governu Japan hamutuk millaun $5 no UNDP hamutuk rihun $300.
Jornalista: Abílio Elo Nini
Editora: Maria Auxiliadora
