DILI, 20 Maiu 2026 (TATOLI) — Prezidente Repúblika Demokrátika Timor-Leste José Ramos-Horta no Vise Primeiru Ministru no Ministru Defeza Australia Richard Marles iha Kuarta ne’e hasoru malu iha Dili hodi diskute asuntu importante tolu – koperasaun iha setor defeza no seguransa, mobilidade laborál, no relasaun Timor-Leste ho Association of Southeast Asian Nations.
Enkontru ne’e hala’o iha Palasiu Prezidensial Aitarak-Laran, Dili, no mós aborda tema seguransa regional, inklui situasaun konflitu iha Mediu Oriente.
Richard Marles dehan durante sorumutu, nia relata ba Xefe Estadu kona-ba ninia diskusaun ho Ministro Defeza Timor-Leste, Donaciano Pedro Klamar Fuik, hodi haforsa koperasaun iha setor defeza.
“Hau relata ba Prezidente Ramos-Horta katak ohin hau ho Ministru Defeza Timor-Leste, Pedro Klamar Fuik, diskute ona kona-ba setor defeza no iha tempu badak sei asina nota entendimentu ida hodi hala’o koperasaun entre Australia ho Timor-Leste iha setor ne’e,” Marles hateten ba jornalista sira iha Palasiu Prezidensial, Díli.
Enkuantu, iha área mobilidade laboral, Marles dehan Australia iha responsabilidade hodi asegura protesaun no tratamentu di’ak ba traballador Timoroan iha Australia.
“Ami-nia komprimisiu mak asegura didi’ak traballador Timoroan iha iha Australia, no koperasaun ida ne’e sei kontinua ba oin mai,” nia dehan.
Marles mós dehan katak enkontru ne’e inklui diskusaun kona-ba situasaun seguransa internasionál, inklui konflitu iha Medio Oriente, no Australia nia komitmentu hodi servisu hamutuk ho Timor-Leste no ASEAN hodi hametin estabilidade regionál.
Nia hateten katak enkontru ho Prezidente Ramos-Horta importante tebes, tanba relasaun entre nasaun rua tebes.
“Prezidente Ramos-Horta konkorda katak Australia no Timor-Leste tenke nafatin hametin koperasaun bilaterál iha seitór oioin ne’ebé antes ne’e estabelese ona no sei kontinua hametin ba oin,” nia konklui.
Jornalist: Camilio de Sousa
Editór: Filomeno Martins
