OÉ-CUSSE, 04 dezembru 2023 (TATOLI) – Diretór Rejionál Agrikultura, Cirilo dos Remédios Baba, hateten, tratór unidade 14 iha Rejiaun Administrativa Espesiál Oé-Cusse Ambeno (RAEOA), hahú fila-rai ba to’os komunidade sira iha suku neen hodi prepara kuda ba époka 2023.
“Ita abertura ona iha semana kotuk, tanba agora tempu udan udan ona, prepara atu kuda ba époka 2023 nian, tán ne’e antes ne’e ita prepara tratór hamutuk unidade 14 maka kondisaun di’ak atu apoia komunidade sira atu fila-rai to’os no natar,” Cirilo Baba ba Agência Tatoli liuhosi telefónika iha Oé-Cusse, segunda ne’e.
Notísia relevante:Autoridade prepara tratór 14 fila-rai iha RAEOA
Nia informa, tratór unidade 14 ne’e, daudaun tratorista sira dezloka ona ba sub-rejiaun tolu, Pante Makasar, Nítibe no Oésilo parte rai tetuk, tanba suku neen maioria Pante Makasar maka submeter ona proposta ba diresaun.
“Sira-ne’ebé agora hatama ona proposta mai iha diresaun, maka suku Cunha, Lalisuk, Costa, Nípani, Bobokase, iha Nítibe maka suku Bene-Ufe hela Oésilo maka seidauk,” nia informa.
Diretór Agrikultura ne’e, argumenta, programa fila-rai ne’e la’ós gratuita maibé kontribui mós hosi to’os na’in-sira, katak Governu prepara tratór komunidade prepara kombustível.
“Polítika ne’e la’ós foin mak aplika, maibé kada tinan, Autoridade aplika hanesan ne’e, katak agrilkultór sira prepara gazolina no gazoel, Governu prepara tratór no tratorista,” nia katak.
Notísia relevante: MAP RAEOA identifika kondisaun tratór molok halo leilaun
Diresaun Rejionál Agrikultura, daudaun ne’e prepara ona tratorista hamutuk na’in-23 inklui mékniku.
Jornalista: Abílio Elo Nini
Editór: Evaristo Soares Martins
