BOBONARO, 19 jullu 2023 (TATOLI) – Progresu fíziku implementasaun Projetu Uma Naroman ba Povu (UNP) faze daruak tinan 2022 iha suku Tapo, postu administrativu Bobonaro, munisípiu Bobonaro foin atinje 15%.
Xefe suku Tapo, Xavier Barreto Cardoso, informa suku Tapo hetan uma unidade sia no aldeia Tapo hetan unidade tolu no aldeia Oepho unidade neen.
Enkuantu hosi unidade sia ne’e, iha unidade neen mak hahú ona konstrusaun no tolu seluk sei ateru ka hadi’ak rai.
Notísia relevante: UNP faze daruak 36 iha Bobonaro-Cailaco seidauk hahú
“Ha’u hanesan autoridade suku, observa no fiskaliza direita iha terrenu, aldeia Tapo-Taz nia sei iha prosesu tanba materiál fabrikadu seidauk to’o, iha aldeia mak uma neen ne’e nia hahú ona konstrusaun maizumenus 10 ka 15%,” nia informa ba Tatoli, iha suku Tapo, tersa ne’e.
Líder komunitária observa katak konstrusaun la’o atrazu tanba menus rekursu hosi Programa Nasionál Dezenvolvimentu Suku (PNDS) atu halo kontrolu kobre projetu sira hotu ne’ebé implementa.
Alende ne’e kondisaun klima liuliu akontese udan-boot difikulta tebes fornesedór sira halo mobilizasaun materiál fabrikadu ba área implementasaun projetu sira-ne’ebé iha liu área remota.
“Agora ita haree ninia prosesu servisu ne’e mós la’o normál, laiha difikuldade ruma, tanba materiál lokál fabrikadu atendimentu hosi kompañia fornesedór sira mós prontu nafatin atu fornese materiál atu halo konstrusaun ne’e,” nia dehan.
Enkuantu iha tinan fiskál 2021 konstrui ona uma unidade 150 iha munisípiu Bobonaro no faze daruak 2022 ne’e konstrui UNP hamutuk unidade 459 ne’ebé implementa iha suku 50, postu administrativu Atabae, Balibo, Cailaco, Maliana, Bobonaro no Lolotoe.
Uma kbiit laek hanesan programa Governu konstituisional VIII liuhosi Programa Nasionál Dezenvolvimentu Suku (PNDS) hodi korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no fó-moris di’ak, hodi redús pobreza no garante ema hotu hetan oportunidade hetan rai no uma hodi bele tulun nia hala’o moris ho dignu no seguru.
Notísia relevante: Suku 13 iha Bobonaro seidauk implementa UNP regulár 2022
Jornalista: Sérgio da Cruz
Editór: Evaristo Soares Martins
