DILI, 03 Juñu 2025 (TATOLI)—Reprezentante Organizasaun Mundiál Saúde (OMS) iha Timor-Leste, Arvindo Mathur, hateten variante foun Covid-19 ne’ebé koñesidu ho NB.1.8.1 ne’ebé afeta daudaun nasaun sira hanesan Índia, Bangladexe no Tailándia, ladún iha impaktu hanesan ho surtu Covid-19.
Tuir Arvind Mathur, variante foun bele kontrola no prevene liuhosi uza máskara no fase-liman, ijiene no sensibiliza informasaun ba komunidade.
“Iha posibilidade menus ba variante foun ne’e tama iha Timor-Leste. Maibé, kontinua iha alerta ba kazu foun sira COVID-19 nian,” nia hateten ba jornalista sira, iha Novo Turismo, Lesidere, Dili, tersa ne’e.
Nia informa katak iha kapasidade laboratóriu nasionál ida atu halo teste karik variante foun ne’e mosu.
Iha fatin hanesan,Vise-Ministru Fortalesimentu Institusionál Saúde, José Magno dos Reis, hateten Governu bele kontrola entrada ba área fronteira sira hanesan rai-maran, aeroportu no tasi.
Jornalista: Felicidade Ximenes
Editór: Xisto Freitas da Piedade
