MANUFAHI, 03 maiu 2023 (TATOLI) – Programa Ai-han Mundiál (WFP, sigla inglés) no Ajénsia Kooperasaun Internasionál Korea (KOICA) entrega materiál dapur ba eskola Kolejiu São Miguel Arcanjo Manufahi hodi utiliza ba tein hahan merenda eskolár ba alunu sira.
Iha okaziaun ne’e, Administradór Munisípiu Manufahi Arantes Isaac Sarmento, agradese ba WFP-KOICA ne’ebé laran luak hodi oferese ona materiál dapur ba eskola katólika São Miguel Arcanjo Manufahi hodi bele utiliza ba tein hahan ba estudante sira.
“Hanesan autoriedade iha Manufahi agradese tebes ba WFP ne’ebé mak ajuda ona materiál mai eskola katólika ida ne’e”, Administradór dehan iha Same bainhira partisipa serimónia entrega materiál hirak ne’e ba eskola refere, kuarta ne’e.
Nia dehan, hanesan servidór ba povu Manufahi sente orgullu ba apoiu ne’ebé WFP fó. Ida ne’e di’ak tebes, bele tulun ona eskola ba merenda eskolár ba estudante sira konsume kada loron.
“Programa merenda eskolár ne’e delega ona kompeténsia mai ami iha munisípiu mak kontrola no ezekuta rasik orsamentu ne’ebé iha, ho nune’e mak ita forma ona ekipa jestaun ida hodi halo implementa programa ne’e rasik tuir dekretu lei ba programa merenda eskolár”, nia esplika.
Nia husu ba responsável eskola sira atu kuidadu materiál hirak ne’e ho didi’ak hodi utiliza ba eskola nia atividade atu sasan hirak ne’e sai ona hanesan patrimóniu eskola nian.
“Sasan hirak ne’e hanesan ona patrimóniu ba eskola nian, labele mai foti fali ba utiliza fali ba atividade seluk ne’ebé la inklui ba merenda eskolár nian”, nia alerta.
Xefe Programa WFP Ali Ahmad Khan, hateten programa ne’e realiza tanba servisu hamutuk entre WFP no KOICA hodi apoiu Governu atu mellora liután programa merenda eskolár iha teritóriu tomak liuliu Ministériu Edukasaun Juventude no Desportu (MEJD) no Ministériu Administrasaun Estatál (MAE).
“Ekipamentu hirak ne’ebé mak ami fó ona ba ita-boot sira ne’e tenke kuida halo didi’ak ba atu estudante sira bele utiliza la’os estudante sira agora ne’e de’it maibé ba estudante hotu ne’ebé sei mai tan ne’e”, nia adianta.
Iha oportunidade ne’e, Diretór Eskola Koléjiu São Miguel Arcanjo Pe. Albino Marques agradese ba WFP no KOICA ne’ebé laran luak apoiu ona materiál dapur lubuk ida ba eskola ne’e.
“Hanesan responsável másimu ba eskola ida ne’e, ami sente kontente tebes ba WFP-KOICA ne’ebé laran luak apoiu ona materiál hirak ne’e mai ami, ami sei utiliza sasan hirak ne’e ho di’ak hodi tein hahan ho nutritivu ba ita nia estudante sira”, Albino revela.
Sasan hirak ne’ebé apoiu hosi WFP mak hanesan sanan, tasu, fugaun, kanuru, basia no seluk tan. Hirak ne’e kona-ba materiál dapur nian.
Aleinde oferese materiál WFP sei fó mós treinamentu ba kuzineira sira ne’ebé sei prepara ai-han ba estudante sira iha kada eskola iha Timor-Leste laran tomak.
Estudante hosi Eskola Koléjiu São Miguel Arcanjo Manufahi hamutuk 380 kompostu hosi primeiru síkulu to’o terseiru síkulu.
Jornalista: Hortencio Sanchez
Editór : Zezito Silva
