DILI, 20 outubru 2022 (TATOLI)—Diretór Interinu Organizasaun Naun Governamentál World Vision iha Timor Leste (WVTL), Humelino Pereira, kinta ne’e, aprezenta dadus kona-ba dezastre sira iha munisípiu Aileu, Baucau, Bobonaro no Covalima.
Aprezentasaun ne’e liuhosi formasaun ne’ebé ho objetivu atu aprezenta fila-fali dadus sira-ne’ebé halibur hosi parseiru Humanitarian Open Street Map Team (HOT) ne’ebé halo iha fulan kotuk liubá.
“Ita hotu hatene katak importante tebes ne’ebé ita presiza iha dadus báziku ne’ebé iha, hodi bele halo planu no prepara atu responde ba uma ne’ebé akontese iha ita-nia rain. Oinsá atu dijitaliza no hodi halo mak mapamentu ba área sira-ne’ebé ita servisu ba, liu-liu halo preparasaun ba dezastre ruma akontese iha ita-nia rai,” Humelino Pereira hateten ba jornalista sira, iha salaun City8 Manleu, kinta ne’e.
Primeiru atu indentifika fatin sira-ne’ebe bele uza halo evakuasaun, se bainhira dezastre ruma akontese iha área sira-ne’ebé temi ba liu-liu hanesan eskola, igreja, fatin públiku sira-ne’ebé impotensialidade halibur ema.
Fatin espesiál impotensialidade atu estraga, bainhira ita hatene planu di’ak atu bele diminui no hamenus risku boot no vítima ne’ebé barak iha dezastre ruma akontese iha rai-laran.
“Tama klimátika no mudansa klimátika globál ne’ebé lori hotu risku ne’e mai iha Timor-Leste hanesan rai halai, inundasaun, no rai nakdoko. Tanba nune’e ita presiza baze dadus ida-ne’ebé di’ak no validu hanesan populasaun sira-nia hela fatin, data demografu fasilidade públiku, fatin negósiu no sira seluk tan,” nia dehan.
Jornalista : Osoria Marques
Editór : Cancio Ximenes
