DILI, (TATOLI) – Primeiru-Ministru, Taur Matan Ruak, hato’o manifesta kondolénsia ba família matebian administradór postu administrativu Zumalai, munisípiu Kovalima, ne’ebé grupu deskoñesidu oho iha Zumalai, horisehik (13\2) madrugada.
Nia dehan Polísia Nasionál Timor-Leste (PNTL) agora serbisu maka’as loos atu buka identifika ajente ne’ebé komete krime hodi hakotu vítima nia moris.
Iha fatin hanesan, Komandante Jerál PNTL, Júlio da Costa Hornay, hateten administradór nia mate ne’e agora iha hela prosesu autópsia para depois bele identifika kronolójia hosi matebian nia mate.
“Prosesu investigasaun la’o tiha ona no konsege identifika suspeitu na’in rua hodi presta deklarasaun. Atu fasilita prosesu investigasaun ne’e la’o lalais, ami reforsa tan ekipa investigasaun hosi nasionál para tulun ekipa investigasaun kriminál hosi Suai”, Hornay haktuir.
Nia hatutan PNTL sei alarga tan ninia investigasaun para deskobre suspeitu sira ne’ebé involve iha prosesu omesídiu refere.
Jornalista: Xisto Freitas
Editora: Rita Almeida
