DILI, 30 novembru 2022 (TATOLI)—Youtuber Timor-Leste, António Ade, sai vensedór iha kompetisaun “Content Creatór” youtuber ho tema produsaun vídeo Turizmu Relijioza.
Nia hato’o agradesimentu ba Maromak tanba liuhosi Nai Nia grasa mak nia bele hala’o atividade ne’e tanba hanesan ninia passatempu halo vídeo depois upload ba youtube liu-liu ninia atividade ho bisikleta bele vizita fatin turizmu sira iha Timor-Leste.
“Entaun, bainhira ha’u halo vídeo ne’ebé la’o ho ha’u-nia passatempu dala ida. Ha’u hanesan backgraoud siklista ida, entaun ha’u sempre ba vizita fatin sira-ne’ebé uniku, dook no ema barak mak seidauk haree. Entaun, iha ne’e ha’u hakarak ba vizita ho ha’u-nia bisikleta hodi motiva fali ema seluk, tanba ha’u ho bisikleta de’it ha’u bele ba vizita fatin ne’e, tanbasá imi labele. Entaun, ha’u hakarak dezafia (sadik) ema hotu atu esplora turizmu nia furak iha Timor,” nia hateten ba jornalista sira iha Pusat Budaya Indonesia, Merkadu Lama, Dili, kuarta ne’e.
Tuir nia, nia parte sai vensedór ho chanel youtube ho naran Adde Xavier ne’ebé kria iha tinan 2019, bainhira moras COVID-19 tama Timor-Leste ne’ebé lori nia labele halo buat ida, nune’e dezafia nia hodi kria chanel youtube rasik.
“Iha momentu ne’ebá motiva tebes ha’u atu kria ha’u-nia youtube, ha’u sente hanesan di’ak tebes. Entaun, ha’u kontinua nafatin ba oin,” António Ade hateten.
Konten youtube ne’ebé halo nia sai vensedór ne’e mai hosi inisiativa rasik no hetan apoiu hosi nia belun sira.
“Youtube ida-ne’e ha’u-nia inisiativa rasik, maibé ha’u-nia inisiativa ne’e atu kontinua ba liután oin, bainhira iha tan kolega balun apoiu. Tanba, bainhira sira haree ka asesu ha’u-nia chanel youtube sira komesa manda mensajen no kontaktu hodi motiva kontinua nafatin. Aleinde ne’e, ha’u mós husu kolega sira-nia sujestaun atu promove di’ak liután, entaun iha ne’ebá kolabora mós ho kolega sira-ne’ebé apoiua ha’u hodi bele nafatin halo edisaun ba video hodi upload iha youtube,” nia dehan.
Nune’e, video ne’ebé lori António Ade sai vensedór ho durasaun minutu haat (4) ne’e, maske ba dahuluk nia tuir kompetisaun “Content Creator” maibé konsege lori nia sai klasifikasaun ba dahaat no iha tinan bele sai vensedór.
“Tanba ne’e, ha’u iha esperansa, ba oin saida mak ha’u iha no hatene, ha’u sei promove di’ak liután,” nia dehan.
Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, parabeniza manán-na’in na’in-lima (5) ne’ebé bele manán ba kompetisaun ne’e.
“Parabéns ba manán-na’in sira. Juri mak sei determina sé mak di’ak no sé mak di’akliu ne’e, dalaruma la sai di’akliu iha tinan oin no ida-ne’ebé di’ak iha tinan kotuk labele di’ak iha tinan ne’e, no ida-ne’e halo ba dala rua no sei kontinua,” nia hateten.
Prezidente ekipa juri ba kompetisaun Content Creator, Dulce Martins, hateten iha tinan ida-ne’e kompetetór ba produsaun Youtuber sira hamutuk na’in-26 no hosi númeru ne’e ema na’in-16 mak entrega sira-nia produsaun video, no hosi ne’e ema na’in-12 mak liu avalaisaun no to’o ikus ema na’in-lima (5) mak vensedáor.
Ba Content Creator sira-ne’ebé mak deskualifikadu mak la tuir kriteira sira-ne’ebé mensiona daudaun hanesan la foti tuir tema, falta iha edisaun téknika, laiha orijinalidade, etika no laiha kontinuidade istória ne’ebé di’ak no la tuir tempu ne’ebé komisuan organizadora sira husu.
Maibé sira-ne’ebe manán-na’in mak sira-ne’ebé foti tema arte kultura, internet saudavél, turizmu relijiozu no infelizmente tinan ida-ne’e laiha aplikante ida mak interrese ho tema kulinária lokal.
Nune’e, ekipa juri fó mós sujetaun katak nafatin ba komisaun organizadora hodi hadi’a buat balun mós iha proxima kompetisaun bazeadu ba esperiénsia tinan ida-ne’e.
“Nune’e, lori ekipa juri hakarak hato’o parabéns ba partisipante hotu iha kompetisaun ida-ne’e, espesiálmente ba sira-ne’ebé manán. Espera ho kompetisaun ida-ne’e bele motiva no enkoraja ita-boot sira kontinua halo produsaun hodi promove rai doben Timor Lorosa’e ba ema lokál no internasionál no haburas ekonomia ida di’ak liután iha futuru,” nia apela.
Juri ba kompetisaun Content Creator ne’e mak dosente UNTL hosi área komunikasaun sosiál, multimedia Dulce Martins da Silva, Pixel Asia, Lena Lenzen, Filmaker Bernadino Hanjam no youtuber Nasional Mosis Salem.
Manan nain lima ba kompetisaun ne’e mak António Ade de A Xavier sai vensedór ho tema produsaun vídeo Turizmu Relijioza ho prémiu $1.000,00, Hipolito Alves dos Santos vensedór daruak ho tema produsaun vídeo Arte no Kultura ho prémiu $750,00, Grupu Alfa Medic ho tema produsaun vídeo Antibiotiku kura moras hotu-hotu ho premiu $500,00, grupu knhs official ho tema produsaun vídeo internet saudavél ho prémiu $400,00 no ikus Grupu The Gajos Boys ho tema produsaun vídeo Kultura Timor ho premiu $350,00.
Jornalista : Nelia Fernandes
Editór : Cancio Ximenes
