BOBONARO, 27 dezembru 2023 (TATOLI) – Sentru Solidariedade Sosiál (CSS) munisípiu Bobonaro, tersa ne’e apoia ai-han nesesidade bázika ba membru Asosiasaun Halibur Defisiénsia Rejiaun Oeste (AHADRO) iha aldeia Tunubibi, suku Tapo-Memo, postu administrativu Maliana hamutuk ema na’in-18.
Diretór Sentru Solidariedade Sosiál Munisípiu Bobonaro, Acacio Gonçalves, esplika, atividade ne’e hanesan servisu sentru solidariedade nian oinsá atu fó apoia ba ema vulnerável no ema ho defisiénsia sira-ne’ebé presiza hetan tulun hosi Governu.
Enkuantu sasán hirak-ne’e mak hanesan; foos, supermie, ikan lata, mina, biscuit no ai-han sira seluk.
“Ohin ita lori netik sasán sira-ne’e, tanba sira iha asoiasaun AHADRO hamutuk ema na’in-18 presiza duni, ida-ne’e la barak, hanesan umanu ita ajuda tuir kbiit no posibilidade ne’ebé sentru iha, atubele tulun netik ba iha loron boot natál ho tinan foun ne’e,” nia katak.
Diretór Ezekutivu AHADRO, Sebastião de Fátima, konsidera apoia ne’e bele hakmaan membru sira-nia neseidade ba loron balun nian.
“Hau lori asosisaun ne’e nia naran louva diretór sentru solidariedade ho nia estrutura, mesmu ke iha loron boot natál, maibé ita-boot sira nafatin konsidera ami (defisiénsia), bazea ba pedidu ne’ebé ami hatama iha semana kotuk, ami husu mak ida-ne’e de’it,” nia dehan.
Enakuntu asosiasaun ne’e ho nia funsionariu hamutuk ema na’in-39 no Asosiasaun ne’e halibur ona ema ho defisiensia hamutuk 300-resin ne’ebé akumula hosi munisípiu Bobonaro, Liquiçá no Covalima.
AHADRO eziste iha tinan 2015 oinsá atu fó advokasia ba ema ho defisiénsia, liuliu ba sira-ne’ebé hela iha remota susar atu asesu imformasaun, edukasaun, saúde no seluktán.
Notísia relevante: ADTL husu Autoridade Bobonaro envolve EhD iha planu ba dezenvolvimentu
Jornalista: Sérgio da Cruz
Editór: Evaristo Soares Martins
