DILI, (ANTIL) – Klubu balun preokupa adeptu sira iha jogu primeira divizaun Liga Futeból Amadora (LFA) iha Estádiu Munisipál Maliana tanba jornada daruak ona hala’o iha estádiu refere, adeptu menus tebes.
“Ami husu ba LFA atu muda jogu ne’e ba estádiu seluk, Estádiu Maliana ne’e adeptu sira menus tebes. Tikete la folin, halo klubu lakon de’it”, Prezidenti Klubu Zebra Baucau, Abrão Santos Oliveira ba ANTIL via telefónema iha nia hela fatin Dili, Segunda, (6/3).
Nia haktuir, sira infrenta prejuizu tanba viajen dala ida ba Estádiu Maliana gasta orsamentu $4000,00, konta ba hahan, hela fatin no transporte. Abrão hatutan, bainhira LFA no autoridade munisípiu la-halo sosializasaun di’ak ba jogu LFA iha Maliana, sira sei halo greve.
Biban ne’e, nia mós senti tristi ho derrota ne’ebé ninia klubu hetan bainhira hasoru Académica FC iha Estádiu Maliana, Domingu (5/3). Kompetisaun ne’e, Zebra lakon ho Académica 0-3.
Derrota ne’e akontese tanba treinadór muda liña jogadór la tuir sira nia pozisaun. Atu prevene lakon liu-tan, nia tenik, sei halo mudansa ba treinadór, treinadór nia estratéjia la produtivu.
Zebra lakon daruak ona iha jogu LFA. Dahuluk, lakon ho AD SLB Laulara ho golu 1-3 iha abertura LFA, Estádiu Munisipál Baucau, 18 Fevereiru liu-ba. Daruak, lakon ho Académica FC ho golu 0-3, Estádiu Maliana, 5 Marsu. (jornalista: Xisto Freitas; editora: Rita Almeida)
