BAUCAU (TATOLI)—Treinadór Zebra FC, Rogerio Mok hateten Cacusan CF la´ós klubu ida ne´ebé maka foin moris maibé klubu antigu no klubu ida ne´ebé esperiente liu tanba jogadór estranjeiru mós iha laran. Maske nune´e, Zebra konsege impata ho Cacusan.
“Ami orgullu ho jogu ida ohin ne´e. Ami sei esforsu hadi´a liña oin hodi hasoru AS Ponta Leste no Karketu Dili FC iha semana oin mai,” Rogerio dehan ba Ajénsia TATOLI iha Estádiu Munisipál Baucau, Domingu (26/03/2017).
Nia haktuir katak sira nia preparasaun kuaze %80. Difikuldade ne´ebé sira hasoru maka jogadór balun eskola no serbisu iha Dili, tan ne´e só sesta maka foin konsentra hodi treinu. Tuir nia katak sé jogadór %100 konsentradu ba treinu, liña Zebra sei fiksu.
“Ida ne´e difikulta tebes ha´u atu monta liña 11. Estrutura hakarak rezultadu ne´e sempre di´ak maibé ha´u hateten ba sira katak imi mós tenki haree kondisaun. Sé kondisaun hosi leten mai ladi´ak, ninia rezultadu ita tenki simu,” Rogerio informa.
Difikuldade seluk, nia dehan, kampu treinu laiha. Nia tenik katak Baucau iha estádiu maibé labele asesu hodi treinu. Treinadór ne´e haktuir, sira hakerek ona karta ba iha Sekretaria Estadu Juventude no Desportu atu asesu estádiu ne´e maibé Prezidenti Juventude Baucau la fó Zebra tama hodi treinu.
Jornalista: Xisto Freitas / Editor: Gantry Meilana
