DILI (TATOLI)—Prezidenti Interino Federasaun Futeból Timor-Leste (FFTL) Osorio Florindo husu atu iha tinan ida ne’e karik bele governu tulun FFTL, espesialmente ba aktividade jogu internasionál sira.
“Governu dehan hakarak atu ajuda ami nia kongresu ne’e. Ha’u nia proposta kongresu ami iha osan, ne’ebé governu hakarak ajuda di’ak, iha tinan ida ne’e ita iha jogus barak iha internasionál ne’ebé governu ajuda de’it jogus hirak ne’e. Kongresu FFTL iha osan rasik,” Osorio Florindo informa ba Agensia Noticioza Timor-Leste TATOLI iha sede FFTL, Kampu Demokrasia, Sesta (31/03).
Nia dehan, jogu iha tinan ida ne’e barak, kompostu hosi jogu sub-15, AFF, AFC. Sub-18-19 AFC, AFF, Sea Games no Sub-23 AFC, Futeból Feminina hitu.
Realizasaun jogu barak hanesan ne’e presiza osan hodi atende kona ba viajen jogador sira nian inklui akomodasaun, tanba ne’e bainhira governu liu-liu Sekretáriu Estadu Juventude Desportu hakarak ajuda FFTL entaun tempu jogu ne’e mak oportunu liu duke kongresu.
Iha oportunidade hanesan nu’udar responsavel ba FFTL Osorio klarifika katak, iha FFTL la ejiste dualismu lideransa, dualismu liga, nune’e mak opinaun sira ne’ebé mak hatete governu atu ajuda solusiona ida ne’e dalan la iha.
“Ami iha ne’e problema la iha. Problema iha mak Ita hetan sansaun administrativu hosi AFC maibé rezolvidu ona,” nia haktuir tan, tanba ne’e mak la rasionál bainhira ita hakarak halo rahun tiha FFTL mak hadia fali.
Kazu sansaun AFC, tuir Osorio, rezolvidu internasionálmente, enkuantu iha Timor-Leste oras ne’e prosesu investigasaun la’o hela.
Internasionálmente rezolvidu tanba FFTL halo ona multa osan ho valor $ 56.000,00 nu’udar garantia ida ba AFC katak dentru de tinan rua nia laran FFTL la bele komete sala ne’ebé mak hanesan.
Ho nune’e iha jogu sub-15,18,19 no 23 ne’ebé FFTL tenki kuida hodi la bele akontese tan erru ne’ebé akontese ona.
“Ha’u sei halo kriteria ida que rigor ba jogador ne’ebé liu selesaun, atu nune’e karik nia dokumentus balun la los nia nain mak tenki responsabiliza,” nia akresenta.
Ba Kazu Amandio Soares sekretáriu jerál sesante FFTL nia, selu ona osan hamutuk $ 9.000,00 husi osan Amandio nian rasik. Nune’e mós Elacio da Silva selu multa ho valor $ 3.000.
Ba Osan ho valor $ 56.000,00 mai duni hosi osan FIFA ne’ebé mak kada tinan-tinan fó ba FFTL nune’e osan refere AFC koa kedan. (Jornalista : Manuel Pinto/Editor : Alberto Alves)
