DILI, (TATOLI) – Foin primeiravez Cacusan CF rezulta pontus 3 hafoin manán AD SLB Laulara ho golu 1-0 iha jogu jornada 5 Primeira Divizaun Liga Futeból Amadora (LFA) époka daruak ne’ebé hala’o iha Estádiu Munisipál Dili, Domingu.
Antes ne’e, Cacusan ultrapasa jornada haat só impata de’it maibé nunka manán. Antisipa Cacusan ba zona dezpromosaun (degradasi), motiva prezidenti klube, João Maneco Soares tún direta diriji jogadór sira. Ho prezidenti nia lideransa hanesan treinadór, lori Cacusan manán ekipa mellor AD SLB Laulara.
Rezultadu ida ne’e maka lori Cacusan sai hosi zona dezpromosaun hodi túr iha pozisaun 4, ho pontus 7. SLB mantein nafatin lidera provizóriu klasifikasaun Primeira Divizaun ne’e ho pontus 10, hosi jogu lima ne´ebé nia ultrapasa.
Golu ba dala uluk hosi Cacusan CF hatama hosi jogador estanjeiru hosi Indonézia, Moises Bangon iha minutu 17. Golu ne’e harame kedas kondisaun Estádiu Munisipál Dili ne’ebé maka lokraik ne’e nakonu ho adeptus.
Jogador João Pedro hosi SLB konsege hetan oportunidade iha minutu 22, maibe la-konsege aproveita hodi halo golu no jogu primeira parte provizóriu lidera 1-0 hosi Cacusan.
Tama ba segunda parte, SLB hasa’e liu tempu hodi halo ataka ba área grandeia Cacusan. Iha oportunidade haat maka la-konsege aproveita ho di’ak hosi jogadór hanesan Nídio Alves nomós João Pedro ne’ebé la-konsege halo golu hodi lori ekipa rua taka jogu segunda parte ne’e ho skor 1-0 ba vitória Cacusan CF.
Jornalista: Xisto Freitas
Editora: Rita Almeida
