DILI, (TATOLI)—Sekretáriu Jerál AD SLB Laulara, Domingos Caeiro hato’o parabens ba Cacusan CF ne’ebé maka manán AD SLB Laulara ho golu mihis 0-1 iha jogu jornada 5 ne’ebé hala’o iha Estádiu Munisipál Dili, Domingu horsehik.
“Klubu rua ne’e (SLB no Cacusan) hatudu jogu kapa’as. Enfelizmente hosi AD SLB sorte maka laiha de’it, maske domina bola hosi primeira to’o segunda parte”, Domingos dehan ba jornalista sira hafoin jogu.
Nia hatutan, derrota ida ne’e mós influensia hosi árbitu ne´ebé maka ladún neutru iha jogu ida ne’e tanba jogadór balun hosi Cacusan dudu monu jogadór SLB maibé árbitu la interven ou husik de’it.
“Ami tenta atu hatudu jogu ne’ebé maka di’ak maibé árbitu maka estraga. Árbitru mós tenke halo reflesaun para depos jogu sira mai ne´e iha kualidade”, sujere.
Iha parte seluk, kapitaun SLB Laulara, Nídio Alves hateten katak loloos sira manán Cacusan maibé oportunidade kuaze dala haat ne’ebé sira hetan la konsege ezekuta ho di’ak. Tuir nia, ida ne’e akontese tanba sira ladún iha konsentrasaun.
“Ami nia fallansu ne’e maka falta konsentrasaun no mentalidade ladún di’ak bainhira hetan oportunidade bola iha grandeia adversáriu”, haktuir.
Jornalista: Xisto Freitas
Editora: Rita Almeida
