DILI, (TATOLI) – Maske FC Porto Taibessi krize ba jogadór kualidade maibé konsege manán Académica FC iha jogu Primeira Divizaun Liga Futeból Amadora (LFA) époka daruak ne’ebé hala’o iha Estádiu Munisipál Baucau, sábadu (22/4).
Vitória ne’ebé FC Porto hetan nu’udar vitória dahuluk hafoin lakon dala lima iha jogu lima ne’ebé liu ona. Ohin loron, FC Porto hamriik ho pontus tolu iha ámbitu falta jogu ida para termina primeira faze liga primeira divizaun.
Úniku golu hosi jogadór estranjeiru, Fernando Asmarouf, iha minutu 66, lori ekipa Porto Taibessi manán ho golu 1-0). Ho rezultadu ida ne’e, la muda Porto Taibessi iha klasifikasaun drimeira divizaun no túr nafatin iha pozisaun ikus ka zona dezpromosaun (degradasi). Enkuatu, Académica FC nafatin okupa pozisaun 6 hosi jogu 6 ho pontus 5.
Iha jogu seluk ne’ebé maka hala’o iha loron hanesan, ekipa Cacusan CF manán As Ponta Leste ho skor 3-2, iha Estádiu Malibaka, Maliana, sábadu (22/04/17). Tanba ne’e, Cacusan provizoriamente okupa terseira klasifikasaun ho pontus 10, hosi jogu 6 ne’ebé maka ekipa ne’e hala’o.
AS Ponta Leste nafatin okupa pozisaun 5 ho pontus 6, hosi jogu 6 ne’ebé maka ekipa ne’e hala’o. Golu hosi Cacusan FC oferese hosi jogadór hanesan Rofino Gama iha minutu 10 no Fransyatma Kefi iha minutu 70 no 86.
Golu rua hosi As Ponta Leste hatama hosi, Shota Tokonaga iha minutu 12, nomós auto golu (golu bunuh diri) ne’ebé maka marka hosi jogador Cacusan CF, António Ximenes, iha minutu 36.
Jornalista: Xisto Freitas
Editora: Rita Almeida
