DILI, (TATOLI) – Prezidente Zebra FC, Abrão Gabriel Santos hateten nia la tau ba kestaun bainhira Zebra FC lakon ho Karketu Dili FC 3-10 iha jogu jornada 6 Primeira Divizaun Liga Futeból Amadora (LFA) époka daruak ne’ebé hala’o iha Estádiu Malibaka Maliana, domingu (23/4).
Nia dehan sira lakon tanba liña defeza monu nomós jogadór balun nia rezisténsia tún. Abrão haktuir katak defeza sentrál Zebra nian labele partisipa iha jogu momentu ne’e tanba hetan dezastre monu ho motór iha Baucau.
“Ami la fó sala ba malu. Ida ne’e akontese tanba ami hasoru problema iha ami nia liña defeza ninian. Ami nia defeza sentrál, Parada, la partisipa iha jogu ne’e tanba aleja. Hosi aujénsia defeza ne’e maka fó oportunidade ba avansadu Karketu hodi halo golu”, prezidente Zebra ba TATOLI iha nia rezidénsia Pantai Kelapa Dili, tersa ne’e.
Abrão hatutan di’ak liu Zebra lakon no dezpromovidu (degradasi) para bele hadi’an án. Nia promete katak iha segunda faze primeira divizaun, sira sei prepara án ho rigór liuhusi treinu tékniku, fíziku no halo try out barak.
Emprezáriu timoroan ne’e informa katak loloos jogu rua ikus iha Maliana ne’e sira hakarak WO (walk out) tanba haree ba kustu ne’ebé boot liu. Maibé, tanba dignidade ou reputasaun, sira kontinua partisipa.
Iha parte seluk, ho rezultadu ne’ebé Karketu hetan iha jogu kontra Zebra, lori Karketu okupa pozisaun segunda klasifikasaun ho pontus 12 hosi jogu 6, no Zebra nafatin iha pozisaun 7, zona dezpromosaun ho pontus 5, hosi jogu 6 ne’ebé maka ekipa ne’e ultrapasa.
Festa golu Karketu Dili atribui hosi jogadór hanesan Alan Leandro iha minutu 8, 83, António Vega iha minutu 22, 33, 56, Oligario Boavida iha 23, 41, Tingga iha minutu 30, 40, 62. Golu tolu hosi Zebra FC marka hosi Marcos de Lima iha minutu 3 nomós golu rua seluk hosi jogadór Ruben iha minutu 76, 85.
Jornalista: Xisto Freitas
Editora: Rita Almeida
