DILI, (TATOLI) — Assalam FC liuhusi jogu dalima manán União FC ho golu 4-1 iha jogu Segunda Divizaun Liga Futeból Amadora (LFA) epoka 2017 ne’ebé maka hala’o iha Estádiu Munisipál Dili, kinta (27/4).
Vitória ida ne’e, lori Assalam FC dudu tún Atletico Ultramar ba pozisaun segunda klasifikasaun hodi lidera grupu B ho pontus 12 hosi jogu 5 ne’ebé klube refere ultrapasa. Ekipa União okupa hikas pozisaun 7, zona dezpromosaun (degradasi). União foin hetan pontus ida hosi jogu tolu ne’ebé maka ekipa refere hala’o.
Golu Assalam FC hatama hosi jogadór hanesan Domingos da Silva 15 iha minutu, Masrudin iha minutu 53,55, Husein Ramos iha minutu 63. Entretantu, úniku golu hosi ADR Uniãio hatama hosi Silvestre Gusmão iha minutu 39.
Enkuantu, iha jogu seluk ne’ebé hala’o iha loron ida antes entre ekipa Lica-Lica Lemorai FC ho Sporting Clube de Timor, ekipa Lica-Lica konsege festa golu ba redi adversáriu ho skor 5-1, liu hosi jogadores hanesan Manuel Carmo iha minutu 14,78, Clementino Vicente iha minutu 21, Nelson Adelino 42 nomós Evanio de Jesus 76. Úniku golu hosi Sporting Clube de Timor oferta hosi Dominggos Pires iha minutu 71.
Rezultadu ida ne’e la muda Lica-Lica FC iha pozisaun 6, zona dezpromosaun ho pontus 3 hosi jogu 3 ne’ebé ekipa ne’e hakat liu ona. Sporting Clube de Timor provizóriu mantein nafatin pozisaun iha terseiru klasifikasaun iha jogu ba dala ikus (jogu 6) ne’ebé maka klube refere hala’o ho pontus 5.
Jornalista: Xisto Freitas
Editora: Rita Almeida
