DILI, (TATOLI) – Golu tolu ne’ebé maka oferese hosi jogadór estranjeiru (Brazíl), Cristian Fabio iha minutu 1, 29 no 81, konsege lori Atletico Ultramar taka jogu ikus iha primeira volta segunda divizaun Liga Futeból Amadora (LFA) époka daruak ho pontus 16.
Klube hosi Munisípiu Manatuto ne’e sai hanesan kampiaun Grupu B, hafoin iha jogu ba dala 6 (ikus) manán ekipa União FC ho golu 4-2 iha Estádiu Munisipál Dili, Kinta (11/5/2017).
Golu haat ne’ebé lori Ultramar ba vitória, golu ida hatama hosi jogadór Rafael Carvalho iha minutu 73. Iha kompetisaun segunda divizaun ne´e, Ultramar manán dala 5, impata 1 no nunka lakon.
Enkuantu, União rasik kontinua okupa pozisaun 7 (zona dezpromosaun) ho pontus 1, hosi jogu 6, impata dala 1 no lakon 5. Golu hosi União hatama hosi Silvestre Gama iha minutu 17 no Andre Sarmento minutu 59.
Jornalista: Xisto Freitas
Editora: Rita Almeida
