DILI, (TATOLI) – Federasaun Futeból Timor-Leste (FFTL) organiza formasaun ba treinadór klube futeból hamutuk ema na’in 24 atu hasai sertifikadu nível B.
Formasaun ne’ebé finánsia hosi Asian Football Confederation (ACF) ho montante orsamentu $50,000.00 hala’o iha Xanana Sport Center, Kampu Demokrasia, Bairos dos Grilhos, Dili, hahú iha 15-27 Maiu 2017.
“Formasaun ida ne’e ho objetivu atu kapasita treinadór sira para sira bele hetan serifikadu treinadór ho nível B”, Prezidente Interinu FFTL, Osorio da Costa Florindo iha nia deskursu bainhira halo abertura ba formasaun refere, segunda ne’e.
Nia informa katak atu lori ekipa nasionál hanesan sub-12, 15 no 18 ba iha rai liur, tenkiser ho sertifikadu nível B.
Durante ne’e, Osorio haktuir, TL sempre kontratu treinadór rai liur hodi lori selesaun nasionál ba tuir kompetisaun AFC tanba seidauk iha timoroan ne´ebé hasai sertifikadu Nível B.
“Selesaun nasionál sub 12, 15 no 18 ne’ebé atu ba tuir kompetisaun AFC, mínimu treinadór tenkiser iha sertifikadu nível B. Kuandu laiha labele tuir kompetisaun refere. Oras ne’e, ita iha de’it treinadór ho sertifikadu nível C no D”, afirma atuál deputadu bankada FRETILIN.
Tuir nia katak atu hetan sertifikadu nível B ne’e la’ós fásil, tanba ne’e nia husu ba formandu sira atu aproveita matenek ne´ebé maka treinadór internasionál oferese. Kritéria atu hetan sertifikadu refere, formandu sira tenki partisipa iha formasaun ho pursentu 100.
Formasaun refere foku ba treinadór ne’ebé maka oras ne’e kaer klube, nune’e depois remata formasaun kontinua ba kaer klube. Instrutór ba formasaun ne’e hosi AFC ho naran C. Nadarajan. Formasaun refere ba etapa primeiru no etapa segundu nian sei hala’o iha Outubru tinan ne’e.
Iha fatin hanesan, asistente treinadór Karketu Dili FC, António Timótio konsidera katak ne’e oportunidade ne’ebé kapa’as teb-tebes tanba bele fasilita timoroan sira.
Nia informa katak bainhira laiha formasaun ba sertifikadu nível B ninian, sei labele lori selesaun nasionál ba tuir kompetisaun iha rai liur.
Jornalista: Xisto Freitas
Editora: Rita Almeida
