DILI, (TATOLI) – Ministru Defeza, Cirilio Cristovão hateten objetivu prinsipál husi Institutu Defeza Nasionál (IDN) mak atu fó formasaun ba futuru lideransa Timor-Leste (TL) nian.
“País hothotu iha, lider sira aban bainrua, liuhusi formasaun karakter, aumenta espiritu nasionalizmu halo nusa mak aban bainrua nia lidera país ida ne’e”, hateten ministru Cirilio Cristovão, ohin iha IDN, Palásiu Governu, Dili.
Tanba ne’e, IDN prezerva hodi forma futuru lideransa, iha F-FDTL (Falintil-Força Defesa de Timor-Leste), PNTL (Polícia Nacional Timor-Leste), governannte no diplomata sira iha futuru.
“Ita hakarak halo investimentu ba país, investimentu ba ita-nia rekursu umanu, governu tenke investe”, salienta.
Hodi reforsa katak harii IDN la’ós haree ba kuantidade kustu tanba nasaun ida hetan respeitu la’os tanba nia rikusoin maibé nia riku ema matenek.
“Ba ha’u hanesan ministru defeza, politikamente ita labele haree ba kustu maibé haree ba investimentu ne’ebé mak ita investe ba ita-nia rekursu umanu, ne’e mak importante”, akresenta governante ne’e.
Tanba ne’e mak hanesan mós mensajen ba timoroan hotu katak kuandu governu investe ba rekursu umanu ne’e importante tebes.
“Ema kuandu respeita país ida, respeita ita tanba ita-nia rekursu umanu, kapasidade lideransa país nian”, haklaken.
Ministru Defeza Cirilo Cristovão mós informa katak IDN ne’e harii kle’ur ona bazea ba Decreto-Lei n.º 12/2010, de 26 de Agosto, institute ida ne’ebé mak importante tebes, governu harii tutela iha Ministériu Defeza nia okos atu halo formasaun, halo treinamentu.
Kursu ba ofisiál sira hodi bele sai major, ba tenente koronel tenke liuhusi kursu ida ne’e. La’ós de’it ba forsa defeza maibé mós ba ofisiál sira husi PNTL nomós ba sívil sira ne’ebé mak iha pozisaun aban bainrua ba tuur iha diretór jerál, ministru, diplomata no seluk tan.
Entretantu vizaun no misaun IDN, asesu iha ne’e: http://idn.tl/idn/missao/
Jornalista: Rafy Belo
Editora: Rita Almeida
