MANATUTU, (TATOLI) – Administradór Munisípiu Manatutu, Fernando de Sousa, preokupa kondisaun irrigasaun iha Mota Laklo, tanba oras ne’e rai-henek taka metin no seidauk suru sai.
“Iha mota Laklo mak konfuzaun uitoan. Rai-henek mai taka, ami presiza apoiu”, katak Administradór, Fernando de Sousa, ba jornalista sira iha iha Kampu Alor, Postu Administrativu Manatutu Vila, Munisípiu Manatutu, tersa lorokraik (19/2).
“Ami sempre hato’o ba nasionál. Hare ne’e kari ona, agora se husik de’it hanesan ne’e ami-nia agrikultór sira halerik tebes”.
Maske nune’e, Administradór rekoñese MAP nia atensaun la’ós Manatutu de’it maibé munisípiu sira seluk mós, nune’e dalaruma rezulta insufisiénsia iha aparellu ka ekipamentu pezadu atu suru sai rai-henek ho lalais.
Administradór mós haktuir antes ne’e irrigasaun Laleia enfrenta mós situasaun hanesan, maibé MAP hamutuk ho Ajénsia Kooperasaun Internasionál Japaun (JICA-sigla inglés) hadi’a ona. “Se fosse momentu ne’e la atende lalais risku boot tebes”.
Kona-ba eletrisidade, tuir administradór la’o ona maibé seidauk hotu. “Ami espera iha área remota iha aldeia sira ne’ebé dook, suku sira dook presiza tan”.
http://www.tatoli.tl/2019/02/komunidade-maliana-halerik-kondisaun-estrada-irrigasaun/
Jornalista: Rafy Belo
Editora: Rita Almeida
