DILI, (TATOLI) – Governu liuhosi Sekretáriu Estadu Komunikasaun Sosiál, Mericio Juvenal dos Reis Akara, alerta ba ministériu hotu inklui sidadaun atu hahú aban, tuku 14:00 bele hala’o ona limpeza jerál iha Timor-Leste laran tomak, bazea ba rezolusaun governu númeru 8/2019.
“Limpeza jerál hahú aban, sesta-feira, tuku 14:00, ministériu ida-idak tenke halo asaun limpeza, nune’e Estatal sei fó orientasaun ba munisípiu hotu atu haree prosesu asaun koletivu hodi halo limpeza jerál”, SEKOMS ba jornalista sira liuhosi konferénsia imprensa, iha sala enkontru Palásiu Governu, ohin.
Rezolusaun ida ne’e sei hahú aplika aban no sei kontinua nafatin, kada fulan iha última sesta, hahú limpeza ho oras ne’ebé hanesan ka depois han meiudia.
“Ida ne’e responsabilidade boot ida, tanba ne’e mak Ministériu Estatal, SEKOMS, Sekretária Estadu Meiu Ambiente sei aviza nafatin liuhosi meius komunikasaun sosiál sira atu dizemina nafatin informasaun hodi bele hasa’e konsiénsia públika”, katak.
Governante ne’e husu ba sidadaun hotu katak aban, sesta lorokraik hahú book-án hodi hamos iha ida-idak nia área, atu sai kultura ida no sai atividade regulár ba ita nia nasaun.
Nia afirma asaun koletivu ida ne’e importante tebes hodi garante ambiente ne’ebé saudavél, no prevene moras inklui turista sira bele mai vizita.
Ida ne’e manifestasaun hosi konstituisaun Repúblika Demokrátika Timor-Leste (RDTL), iha artigu 6 ne’ebé ezije sidadaun atu proteje ambiente no prezerva rekursu naturál sira. Ida ne’e sai baze legál, husu atu bele proteje ambiente, promove ambiente ne’ebé moos.
Sorin seluk Diretór Nasionál Ordem Públiku hosi Ministériu Administrasaun Estatal, Egas José Caetano, akresenta mapamentu limpeza jerál, instituisaun governu sei hetan hotu oráriu no sei hahú limpeza bazea ba mapamentu servisu ne’ebé fahe ona. Enkuantu mapamentu ne’e elabora hosi Estatal liuhosi autoridade munisipál Dili.
Entretantu, Diretór Jerál Sekretáriu Estadu Meiu Ambiente, João Carlos Soares, salienta governu sempre halo asaun edukativu maibé hahú hosi rezolusaun ne’e bele hamosu asaun konkretu ida ne’ebé rezulta ambiente ne’ebé sei moos iha rai laran.
Jornalista: Zezito Silva
Editora: Rita Almeida
