DILI, 18 jullu 2019 (TATOLI)—Ministru Transporte no Komunikasaun, José Agostinho da Silva hateten, prioridade ministériu iha tinan 2020 ne’ebé liga ho infraestrutura aeroportu, sei prevé orsamentu liliu konstrusaun aeroportu ho padraun internasionál.
“Liga ba transporte aeru, oinsá mak ita konstrui ita-nia Aeroportu Internasionál Prezidente Nicolau Lobato ho priénxe rekizitu ne’ebé mak di’ak no priénxe rekizitu padraun internasionál. Ho ninia pista ne’ebé mak naruk, ho kondisaun terminál ba pasajeiru ne’ebé mak di’ak para bele atrativu,” tenik Ministru ne’e iha Palásiu Governu, hafoin haroru malu ho Xefe Governu, Taur Matan Ruak, hodi ko’alia kona-ba prioridade ministériu iha tinan 2020, kinta ne’e.
Kona-ba to’o oras ne’e Governu Timor-Leste no Governu Japaun seidauk troka nota ofisiál ba kontrusaun aeroportu, nia admiti aeroportu ne’ebé priénxe rekizitu internasionál, presiza tan orsamentu.
“Ita hotu hatene, Governu Japaun ho ninia kompromisu tomak oferese Grant (orsamentu) ho valór millaun $44 ba Governu Timor-Leste hodi konstrui aeroportu. Ninia prosesu la’o, maibé ita hotu hatene Aeroportu Internasionál Nicolau Lobato atu konstrui ninia valór ita presiza tan osan, tanba sei ita halo komparasaun Aeroportu Internasionál Oé-Cusse de’it, ninia montante orsamentu hodi konstrui hamutuk millaun $120,” José Agostinho esplika.
Nia akresenta, ho Grant millaun $44 hosi Governu Japaun, presiza haree orsamentu ne’e hodi finánsia verba (item) ida oinsá.
“Tuir diskusaun tékniku, osan ne’e atu halo terminál pasajeiru, konstrui torre kontrolu ho verba tolu tan, hamutuk verba lima. Ita-nia proukupasaun mak aeroportu ne’e iha kapitál nasaun ninian, entaun ita tenke konstrui aeroportu ida di’ak liu aeroportu seluk ne’ebé eziste, para bele akomoda aviaun boot sira en-termu runway no pista tenke naruk, nune’e mós kondisaun infraestrutura terminál pasajeiru tenke di’ak,” nia realsa.
Membru governu ne’e esklarese, prosesu la’o hela tanba ne’e labele iha opsaun ida de’it maibé tenke iha opsaun barak para haree ida ne’ebé mak di’ak ba Timor-Leste.
Jornalista: Julia Chatarina
Editór: Xisto Freitas
Notísia Relevante:
PM Hakarak Aeroportu Dili Di’ak Liu Oe-cusse
