DILI, 14 outubru 2019 (TATOLI) – Institutu Apoiu Dezenvolvimentu Emprezariál (IADE) realiza kompetisaun planu negósiu inovativu ba dala neen ho kompetidór na’in-sanulu.
Diretór Ezekutivu IADE, Filomeno Marcelino Belo, afirma programa kompetisaun Planu Negósiu Inovativu IADE hala’o kada tinan dezde iha 2013 to’o 2019.
Kompetisaun planu negósiu iha tinan 2019 ne’e ho tema ‘Muda Ó-Nia Moris ho Agro Negósiu’. Razaun foti tema ida ne’e tanba Timor-Leste hanesan nasaun agrária ne’ebé iha ninia potensialidade boot tebes iha setór agrikultura presiza dezenvolve hodi nune’e bele kontribui ba dezenvolvimentu ekonomia Timor-Leste nian agora no bá oin.
“Objetivu hosi kompetisaun Planu Negósiu Inovativu ida ne’e atu fó motivasaun no fó oportunidade liuliu ba foin-sa’e sira feto no mane atubele iha ideia inovativa hodi bele kria postu serbisu ba sira-nia aan rasik no mós ema seluk”, dehan Diretór Ezekutivu iha Timor Plaza, ohin.
Nia hatutan programa ne’e kontribui mós ba planu Governu Daualuk nian katak kada tinan sei loke postu traballu ba ema rihun 60.
Atu realiza kompetisaun ba tinan ne’e, Diretór Ezekutivu IADE ne’e esplika katak liuhosi prosesu ida ne’ebé naruk hahú hosi lansamentu, halo promosaun ba territóriu Timór, no kontinua ba rejistrasaun ba partisipante hamutuk 380, hosi númeru ne’e porsentu 35 feto, depois rejista kontinua ba formasaun dahuluk kona-ba ‘Buka Ideia Negósiu’.
“Ami fó formasaun fali ba sira tanba ideia ba negósiu seidauk iha, depois formasaun ami hili fali sira ne’ebé tama kategoria inovativu, depois fó tan formasaun ba faze segunda kona-ba Komesa Ita-Nia Negósiu. Husi ida ne’e hetan tan fali sira ne’ebé di’ak liuhosi aprezenta ba juri interna maka ikus mai hetan na’in-sanulu di’ak liu hodi mai tuir kompetisaun finál ne’e”, esplika Filomeno.
Rekizitu atu konkorre iha kompetisaun ne’e maka tenke timoroan, iha ideia ne’ebé inovativu duni, iha vizaun hodi sai emprezáriu foun ba Timor-Leste. Rezultadu ba kompetisaun ne’e sei fó sai iha kuarta ne’e (16/10).
Jornalista : Antónia Gusmão
Editora : Maria Auxiliadora
