DILI, 04 dezembru 2019 (TATOLI) – Tane Konsumidór informa ba kompradór timoroan sira atu atensaun ba produtu sira no konsume hahán ho kualidade tanba besik ona selebra loron Natál no tinan foun 2020.
“Hanesan halo advokasia ba konsumidór hakarak bolu atensaun ba públiku, liuliu konsumidór sira katak besik ona tama ba festa Natál ne’ebé tenke atensaun ba produtu sira ne’ebé atu konsume. Durante períodu festa ne’e presiza hatene liuliu kona-ba kestaun ba ninia rotulajen ne’ebé tuir lei konsumidór tenke asesu ba informasaun no informasaun sira ne’e tenke hakerek ho lian ofisiál Timor-Leste nian kona-ba produtu prontu nian no konsume mais moderadu”, hateten Prezidente Tane Konsumidór António Ramos da Silva liuhusi konferénsia ba imprensa iha Vila Verde, ohin.
Aléinde ne’e, Asesór Imprensa Tane Konsumidór, Rosalino Soares, realsa hakarak halo kampaña ba kompradór katak tenke hatene informasaun sira ne’ebé iha produtu nia laran.
“Ne’e duni, konkretamente iha rotulajen tanba iha ne’e mak informasaun produtu nian konstan hotu iha laran. Tuir fali maka validade produtu nian tanba dala ruma la tau atensaun ba validade produtu bele prejudika ema nia saúde”, dehan Rosalino Soares.
Nune’e informa mós ba konsumidór sira durante festa Natál ho moderadu ho kualidade. “Moderadu katak labele konsume ne’ebé ezajeru liu, ezemplu, konsume bebida alkol sira hodi kontribui ba seguransa iha loron boot ne’e”.
Nia hatutan, kona-ba uza saku ka bornál bainhira ba sosa sasán iha supermerkadu sira ne’e kontribui ba programa zero plástiku.
Nune’e mós Jurista Tane Konsumidór, Juvêncio Amaral, salienta iha Konstituisaun RDTL iha artigu 53 hateten klaru ona kona-ba direitu konsumidór nian. Artigu ne’e iha alinea 1 dehan Konsumidór sira iha direitu atu simu sasán no servisu ne’ebé maka iha kualidade, no mós atu hatene informasaun loos, kona-ba sasán sira-ne’e atu proteje sira-nia saúde, seguransa no mós interese ekonómiku hanesan mós atubele hadi’a buat ne’ebé aat.
“Aléinde artigu 53 iha mós lei númeru 8/2016 kona-ba protesaun ba konsumidór. Tan ne’e maka atu garante direitu konsumidór maka Tane Konsumidór husu ba komunidade sira hodi buka solusaun ba problema ne’ebé aprezenta relasiona ho produtu ninian”, afirma Juvêncio.
Durante ne’e Tane Konsumidór simu keixa kona-ba produtu konsumivel ho produtu non konsumivel. Produto non konsumiveis maka hanesan; elétrika no telekomunikasaun.
Iha parte seluk, Autoridade Inspesaun no Fiskalizasaun Atividade Ekonómika no Sanitária (AIFAESA), sei halo mós inspesaun rutina bá loja no supermerkadu iha Dili laran atubele asegura produtu hotu ne’ebé fa’an iha loron boot Natál.
“Ami iha ona planu katak iha fulan ne’e, ami mós sei halo inspesaun rutina bá loja no supermerkadu sira iha kapitál”, dehan Xefe Divizaun Operasaun AIFAESA, Alfonsius Costa Akoyt ba Ajénsia TATOLI iha merkadu Manleuana, tersa ne’e.
Atividade inspesaun ne’e ho baze ba planu prioridade ne’ebé trasa ona ba dezembru nian.
Jornalista : Antónia Gusmão
Editora : Maria Auxiliadora
