DILI, 09 setembru 2020 (TATOLI)-Governu liuhosi reuniaun Konsellu Ministru (KM) aprova projetu dekretu-lei ne’ebé aprezenta hosi Ministru Administrasaun Estatál, Miguel Pereira de Carvalho, ba alterasaun dahuluk ba dekretu-lei númeru 11/2019, 14 juñu, kona-ba Orgánika Ministériu Administrasaun Estatál (MAE).
Ministru Prezidénsia Konsellu Ministru, Fidelis Manuel Leite Magalhães, hateten iha orgánika foun ne’e kria diresaun jerál ida ba dezenvolvimentu rurál iha MAE.
“Projetu dekretu-lei ne’e kria diresaun jerál foun ho objetivu atu reforsa ba área dezenvolvimentu rurál no lokál, halo reforsu ba kompeténsia atuál diresaun nasionál ba modernizasaun administrasaun lokál,” informa Ministru Fidelis, hafoin reuniau KM, iha Palásiu Governu, kuarta ne’e.
Diploma ne’e mós kria diresaun nasionál ne’ebé responsável ba área informátika no teknolojia informasaun ministériu nian no diresaun nasionál ne’ebé responsável ba matéria protokolu, komunikasaun institusionál, relasaun públika no kooperasaun esterna MAE.
Jornalista: Antónia Gusmão
Editora: Julia Chatarina
