DILI, 14 setembru 2020 (TATOLI)-Sekretáriu Estadu Juventude no Desportu (SEJD), Abrão Saldanha, hateten daudaun ne’e nia parte kontinua estende tan kontratu ho kompaña Obrai Unipessoál LDA, hodi finaliza projetu konstrusaun Estádiu Kay Rala Xanana Gusmão iha Munisípiu Manatuto.
Projetu konstrusaun Estádiu Kay Rala Xanana Gusmão, gasta orsamentu hamutuk tokon $ 2, no governu selu ona pursentu 70 ba kompaña implementadór obra ne’e.
Notísia Relevante :Estádiu Manatuto Kontinua Paradu Tanba Kompañia la Hakbesik ba SEJD
“Estensaun ba Estádiu Manatuto sira husu fulan 11, Kompaña Obrai mak sei nafatin ka’er, sira halo ona prosesu interna sira nian. Ida sosiu primeiru ne’e faan tiha ona nia asaun ba ida seluk ne’ebé agora sira iha fali asaun foun no iha garantia iha osan para finaliza lalais obra ne’e,” dehan Abrão Saldanha, ba Tatoli iha ninia servisu fatin SEJD, Lecidere, segunda ne’e.
SEJD sei estuda hela pedidu Kompaña Obrai atu kontinua projetu ne’e durante fulan 11.
Nia dehan, orsamentu ba projetu ne’e maihosi fundu infraestrutura, tuir kontratu projetu ne’e komesa iha 2015 no ramata iha 2018, maibéto’o ohin loron seidauk finaliza.
Notísia Relevante :Estádiu Manatuto-Dili Paradu, Gleno La’o Di’ak
Jornalista : Hortencio Sanchez
Editór : Agapito dos Santos
