MANUFAHI, 24 novembru 2020 (TATOLI)—Ministru Obra Públika, Salvador Eugênio Soares dos Reis Pires, akompaña husi autoridade lokál no Reprezentante Embaixadór Austrália ba Timor-Leste, inaugura reabilitasaun estrada ho kilómetru 3,6, liga husi Betano bá Luro.
Reabilitasaun estrada rurál ne’e finansia husi Governu Timor-Leste (100%) ho montante orsamentu millaun $599,6 no implementa husi programa Estrada Rurál ba Dezenvolvomentu (R4D, sigla portugés).
Programa ne’e hetan apoiu husi Governu Austrália liuhosi International Labour Organization (ILO) ninia asisténsia téknika.
Iha seremónia inaugura estrada rurál ne’e, Administradór munisípiu Manufahi, Arantes Isaac Sarmento, konsidera infraestrutura ne’e importante ba komunidade Manufahi.
“Projetu reabilitasaun estrada rurál ne’e fasilita tebes komunidade hodi asesu ba transporte públiku, atu nune’e sira bele asesu ba merkadu, la’ós ba komunidade de’it maka asesu ba estrada, maibé estrututura Estadu no Governu iha nível munisípiu,” Administradór tenik durante intervensaun iha seremónia inaugurasaun iha munisípiu Manufahi, tersa ne’e.
Infraestrutura ne’e sei benefisia no fornese servisu públiku durante tinan tomak, ba suku ida no aldeia hitu, ho totál populasaun hamutuk ema na’in-2.085 husi totál uma-kain 513.
Aleinde ne’e, komunidade iha Betano agora bele asesu transporte públiku hodi lori sira-nia produtu bá merkadu Same.
Governu kontinua fó prioridade ba konetividade sira atu garantia povu ninia sirkulasaun liuhosi hadi’a estrada rurál.
“Ita kontinua hametin konetividade nasionál área produtiva sira no merkadu atubele fó asesu ba povu sira iha merkadu husi sósiu ekonómiku,” nia esplika.
Autoridade munisipál Manufahi ne’e relata, ho reabilitasaun ne’e, estrada rurál iha munisípiu Manufahi rasik atinje ona kilómetru 112.
Nia konsidera, projeitu sira la’o di’ak tanba iha kontribuisaun servisu entre ekipa R4D, Ministériu Obra Púbklika (MOP), Autoridade munisípiu Manufahi inklui komunidade.
Biban ne’e, Arantes Isaac husu Governu kontinua fó importánsia ba reabilitasaun estrada rurál sira liuhosi kooperasaun R4D, tanba iha munisípiu Manufahi iha aldeia balun maka seidauk asesu estrada.
“Ha’u espera programa reabilitasaun estrada husi Governu, ne’ebé parseria ho parseiru dezenvolvimentu Governu bele realiza ida ne’e,” nia hatutan.
Iha fatin hanesan, Diretór Kompañia Manufahi Lui, Francisco Akoilião, hateten reabilitasaun estrada kilómentru 3,6 ne’e halo durante fulan-ualu loron sanulu.
Governante ne’e konsidera, reabilitasaun estrada rurál nu’udar meiu importante atu fasilita komunidade Manufahi asesu ba merkadu.
Nune’e mós, Reprezentante komunidade suku Betano-Loro, Domingos Pereira, apresia programa reabilitasaun ne’ebé Governu halo liuhosi R4D.
“Nu’udar povu, ami agradese buat hotu ne’ebé Governu halo no kontente, espera Governu kontinua ho programa reabilitasaun estrada rurál nune’e bele benefisia komunidade sira hotu asesu ba estrada ho di’ak,” nia apresia.
Hahú 2011 to’o agora, Governu Austrália fó apoia finanseira liuhosi programa asisténsia téknika ba reabilitasaun estrada rurál ho fundu millaun $26 hodi dezenvolve estrada rurál.
Jornalista: Natalino Costa
Editora: Julia Chatarina
